Endamê Platformê Kede û Demokrasî yê Amedî Behçet Barût, meşo ke do 1ê Êlule de Amed de bêro viraştiş rê veng da ke her kes tewrê ci bibo û va: “Seba ke aştîyêka daîmî virazîya, ma do bimeşê. Ganî ma dinyayêka ke tede aştîye est a, awan bikerê.”
Emserre bi wesîleya 1ê Êlule Roja Aşitîye ya Dinya, bi sloganê “Seba komela demokratîke vengê xo bide aştîye” do zafê şaristanê Kurdistanê Bakûrî û Tirkîya de panel, meşî û mîtîngî bêrê viraştiş. Yeno pawitiş ke nê çalakîyan de do bal bêro antiş serê prosesê “Aştîye û Komelê Demokratîkî” zî. Yew zî nê şaristanê ke do bi wesîleya 1ê Êlule tede meş bêro viraştiş Amed o.
Amed de pêşengîya Platformê Kede û Demokrasî yê Amedî û Platformê Sazîyanê Demokratîkan de, bi tewrêbîyayîşê Hemserekê Pêroyî yê DEM Partîye Tuncer Bakirhan û Hemsereka KESK’î Ayfer Koçake meş do bêro viraştiş. meşo ke do saete 17.30 de 1ê Êlule de dest pêbikero, do vernîya banê DEM Partî yê Qezaya Rezanî ra dest pêbikero û vernîya banê AZC Plaza yê ke semtê Ofîsî de yo, bi eşkerayîyêke biqedo. Eşkerayîye de do Tuncer Bakirhan û Ayfer Koçake qisey bikerê.
‘Seba komelo demokratîk, vengê xo bide aştîye, kuçeyan de bibê’
Vilavokê ke seba meşî amade bîyo, tede wina yeno vatiş: “Vengdayîşê ma seba şarê ma, cinîyan, ciwanan, karkeran, kedkaran û heme bindestan o! Seba ke bingeyê aştîye bi rayîrê dîyalogî hîra bibo, seba ke mesela kurdan bi hawayêkê demokratîkî çareser biba, seba vindarnayîşê hêrişanê vera bawerîyanê cîyayan û cinîyan ê Rojhelatê Mîyanênî, seba nasîyayîşê nasnameyan, azadîya fikir û ramanî û hemwelatîbîyayîşê yewbînî, seba cuyêka yewbînan û adîle ya vera feqîrîye, bêkarîye û kedwerîye, seba vindarnayîşê rijnayîşê ekolojîk û tebîetî, seba vindarnayîşê şîdetê vera cinîyan, seba ke Komare bi demokrasîye bêro tacîdarkerdiş, seba ke ma dormeyê komela demokratîke de bêrê têhet û yew enternasyonalo newîye bingeyê aşitîye ser o awan bikerê, seba ewro û sibayê karkeran, bêkaran, ciwanan, domanan, kedkaran, bêewleyan û heme bindestan ma do 1ê Êlule de seba bi şîarê ‘seba komelo demokratîk vengê xo bide aştîye’ kuçeyan de bibê.”
Endamê Platformê Kede û Demokrasî yê Amedî û Hemserekê Şaxê Hûmara 2. yê Genel-Îşî yê Amedî yê ke giredayeyê DÎSKî yo, Behçet Barûtî derheqê meşî de ajansê ma rê qisey kerd.
‘Ganî ma dinyayêka ke tede aştîye est a, awan bikerê’
Behçet Barut bala ante serê prosesê ewroyî û waşt ke heme şarê dinya paştî bidê şarê kurdî. Behçet Barut da zanayîş ke ganî şerî êdî bêrê vindarnayîş û wina va: “Ganî ma dinyayêka ke tede aştîye est a, awan bikerê. Ma sey sazîyê demokratîkî ganî 1ê Êlule de wezîfeyê xo bîyarê ca û ganî ma paştî bidê nê prosesê aşitîye. Ma wazenê ke şer biqedo. Seba no zî ma do 1ê Êlule de mesajenê xo bidê heme dinya.”
‘Sey şarê Amedî ma do mesajanê xo bidê heme dinya’
Behçet Barût seba meşê 1ê Êlule yo ke do Amed de bêro viraştiş, veng da heme şarê Amedî û wina dewam kerd: “Waştişê ma şarê ma ra o yo ke nê meşî de paştî bidê ma û bi hezaran kom bê û sey şarê Amedî mesajenê xo bidê heme dinya. Ma do bi ziwanê dayîka xo aştîye biwazê. Wa êdî ciwanî û keyeyê ma zerar nêvînê. Seba ke aştîyêka daîmî virazîya, ma do bimeşê.”
