Keyeyêko ke 8 kesan ra yeno pê, demo ke gêrayîşî ra agêrayenê, seba qiseykerdişê xo yê bi Kurdkî hêrişê faşîstan reyde rî bi rî mend.
Dewa Kîsecîk a qezaya Çamliyayla ya Mersînî demo ke keyeyêko kurd ke 8 kesan ra yeno pê, gêrayîşî ra agêrayêne, bi manaya qiseykerdişê bi Kurdkî hêrişêko faşîzan reyde rî bi rî mend. Goreyê xebera Ajansê Mezopotamyayî; hêriş vizêr saete 17:30î de ameyo kerdene. Ame zanayene ke keyayê Kîsecîkî zî tede grûbêka faşîste hêrişê keyeyî kerdo. Dekewtişê dewe de wesayîta keyeyî ya bi plakaya 01 ECL 92 ameya vindarnayene û ewil şîdet pê fekî keyeyî rê ameyo kerdene. Grûba faşîste dima zî keyeyî ra vato, “Tîya Komara Tirkîya yo, şima senî bi Kurdkî qisey kenî” û dima ra hêrişê keyeyî kerdo.
Keyeyo ke mîyanê ci de cinî û pîçekêko 3 aşme zî est bîyo, hêrişî ra pey bi îmkananê xo şîyê Nêweşxaneyê Şaristanî yê Mersînî. Kesanê ke ameyê derbkerdene Adnan Nazli berdo beşê ewnîyayîşê awarte û endamê bînî yê keyeyî zî lingan ser o ameyê tedawîkerdene. Gereyê keyeyî ra pey, hêrişkarî ameyê destbendkerdene û ê berdê Mudireyetê Polîsan ê Tarsusî.
