Endamê Konseya Rayberdişî ya KCK’yî Musatafa Karasu vat komîsyon gerek verî şiro Rayber Apoyî reyde munaqeşe bikero, têna bi prosesê çekronayîş û agêrayîşî sînordar memano û semedê çareserkerdişê meseleya krudan gamanê demokratîkan bierzo.
Endamê Konseya Rayberdişî ya KCKyî Musatafa Karasuyî Medya Haber TV’yî rê rojdem erjna. Qiseykerdişê Karasuyî ra qismêk wina yo:
“Bi serran o heqê hêvî yeno redkerdene. Mehkemeya Heqanê Merdiman a Ewropa 10 serrî verî qala heqê hêvî kerd. Par zî hîşyar kerd û serrêke dima reyna rojdem de yo. La hema zî dewleta tirke game nêeşte. Xora gama winayênî nizdîbîyayîşê vera Rayber Apoyî, vera meseleya kurdan, vera prosesî zî mojna ra. Qanûnê ke morê ci binê de yo binpay kenê. Devlet Bahçeliyî eşkera wina vat: ‘Wa rêxistine fes bikero, têkoşînê çekdarî caverdo, heqê hêvî bêro caardene.’ Heta vat ‘wa bêro meclîs de qisey bikero.’ Xora înan cesaret nêkerd Rayberîye meclîs de qisey bikero. No têna vatişê Behçeliyî nêbi, bi pêkerdişê Erdoganî a eşkerayîye kerde. Reyna fîkro hempar ê îqtîdarî yo. Coka gerek îqtîdar nika heqê hêvî bîyaro caardene.
Nika ma prosesê muhîmî ra ravîyarenê. Raşta zî Rayberîya ma û têgêrayîşê ma qerardar ê. Ma wezenê nê prosesî heta demokratîkbîyayîşê Tirkîya û çareserkerdişê meseleya kurdan bidomnê. Ma bi na qerardarîye gamê xurtî eşt ê. kêmîya zaf pîla ke hema heqê hêvî nêkewto dewre, Rayber Apo nêeşkeno şertanê azadan de bixebito. Gerek na kêmîye werte ra bêro wedaritene. Eke wina bibo proses dahîna aver şino, averşîyayîşê pozîtîfî benê û qesawetê şarî qedîyeno.
Adresê çareserkerdişê meseleya kurdan meclîs o. Coka ronayîşê komîsyonê meclîsî muhîm o. Çîyo muhîm o yo ke no komîsyon do senî bixebito û hedefê ci do çibo. Gerek no komîsyon bi qanûnî biamyêne ronayene û derheqê çareserkerdişê meseleya kurdan de programêkê ci bibênî. Nê hema zalal nîyî la ronayîşê komîsyonî muhîm o. Gerek no komîsyon verî Rayberîye de pêvînayîş bikero. Çunke muxatap Rayber Apo yo. Seba ke komîsyon xebata raşte bikero gerek verî Rayber Apoyî reyde munaqeşe bikero. Xebatê komîsyonî yê 2-3 mengan qîm nêkenê. Komîsyon gerek têna bi prosesê çekronayîş û agêrayîşî sînordar memano û semedê çareserkerdişê meseleya kurdan gamanê demokratîkan bierzo. No porses semedê asayîşê Tirkîya ame destpêkerdene. Coka eke xebatê komîsyonî bêrê sînordarkerdene no prosesî sabote keno.”
