Rayberê GOÇ-DER’î Hasan Erzî derheqê rol û mîsyonê komîsyono ke meclîsî de ame awankerdene vat: “Lazim o no komîsyon şert û mercanê agêrayîşê koçberan ser o xebatan bikero. Çi warê qanûnî de çi warê komelî û aborî de ganî bingeyê agêrayîşî awan bikero.”
Serekê Meclîsê Tirkîya Numan Kurtulmuş 27ê temmuze de eşkerayî daye û dîyar kerd ke do Meclîs de komîsyon bêro awankerdene. Eşkerayîya Numan Kurtulmuşî ra pey partîyanê sîyasîyan endamê xo yê komîsyonî eşkera kerdî. Ameyêne zanayene ke do temsîlkarê sazgehanê sîvîl û komelî zî do komîsyon de ca bigîrê la no waştiş nêame ca. Rayberanê Komela Cigêrayîş û Taqîbkerdişê Koçan a Mezopotamyayî (GOÇ-DER) Hasan Erzî derheqê rol û mîsyonê komîsyono ke meclîs de ameyo awankerdene û muhîmîya ey de ajansê ma rê qisey kerd.
‘Bêbingeh çareserî mumkin nîya’
Rayberê GOÇ-DER’î Hasan Erzî dîyar kerd ke lazim bi ke temsîlkarê sazgehanê komelî zî komîsyon de ca bigirewtêne û vat: “Serranê 90î de Kurdîstan de bi hezaran dewî ameyê talankerdene û vengkerdene, bi mîlyonan însanî koçber bîyî. Zor û zehmetîyê girdî dîyî. Demo ke temsîlkarê nê însanan komîsyonî de ca nêgîrê, derheqê komîsyonî de şikî benê, bêhêvîtî bena. Lazim o no komîsyon şert û mercanê agêrayîşê koçberan ser o xebatan bikero. Çi warê qanûnî de çi warê komelî û aborî de ganî bingeyê agêrayîşî awan bikero. Bêbingeh çareserî nêbena.”
‘Dewlete amade nîya’
Hasan Erzî beşdarnêkerdişê temsîlkaranê sazgehanê komelî ê komîsyonî ser o zî qisey kerd û wina dewam kerd: “Bi hezaran dewî ameyê veşnayene, bi des hezaran însanî ameyê kiştene, tehrîbatêko gird virazîya heta nika. Dewlete amade nîya ke bi nê kerdişanê xo rey de rî bi rî bêra. O bîn zî goreyê mi ewro mîyanê dewlete de hetê ke nêwazenê no proses aver şêro û aştî biba, est ê. Goreyê mi hetê dewlete de keso ke tewr cidî nêzdîyê meseleyî beno, Devlet Bahçelî yo.”
‘Milçike bi baskêk nêeşkean bifira’
Hasan Erzî tewr peyên îfade kerd ke proses yew het reyde rayra nêşono. Lazim o dewlete zî samîmî nêzdîyê meseleyî biba û qiseykerdişê xo wina domna: “Hêvîya ma bi Rayber Apo û rayberîya nê şarî ra est a, samîmî yê, 93î de zî, 2013 û 2015î de zî samîmî bîyê. La seke Bahçelî zî vat milçike bi baskêk nêeşkena bifira, gere di baskê aye est bî ke bieşka bifira.”
