Cayê karê ke Pirdo Desberî çar hetan ra kerdo îşxal, hem pirdî û hem zî Gelîyê Dîcleyî xirab kenî, yew semavera çaye 800 lîra ra roşenî.
Amed de yew cayo ke turîstî yo, Pirdo Desberî zî Lîsteya Mîrasê Çandî yê Cîhanî yê UNESCO’yî de yo. La, kafeyê ke dormeyê pirdî de, Çemê Dîcleyî de ameyî viraştene, hem zerar danê pirdîyo tarîxî hem zî dormeyî xirab kenî û pîs kenî. Cayê karê ke bi awayê fîîlî cayê îşxal kerdî, ewro bîyî daîmî. Xeylê kafeyan rê destûr ame dayîş û xeylê cî zî bêdestûr ê. Hem Mudurîyetê Herêmî yê Pawitişê Cuyeyanê Kulturî û hem zî rayberîya herêmî seba naye bêveng manenî û tu mudaxileyê nêkenî.
Goreyê xebera MA’yî rîyê kafeyan ra merdim şiro boya xo bido nêmendo. Her wina, wayîrê kafeyan yew semavera çeye 800 lîra ra roşenî û bi no awayî merdiman xapînenî.
Welatij Metîn Baran wina va: “Wexto ke ma qîj bîyî, no ca bêheq bî. Çi ke şi kerdî bi pereyî. Seba naye ne turîstanê welatî ne zî turîstanê teberî yeno. Ê ke yeno zî serê pirdî ra derbas benî. Pirdo henî weş tu ca de zî çin o. Gere no ca bipawo. Waştişê ma seba şaredarîya ma yo; wa ewta ra mudaxile bikera û tarîxê Amedî bipawa. Nîya nêbo, no ca vindî beno.”
Seyît Acar o ke Stenbol ra seba geyrayîşî ameyol Amedî wina va: “Ewta de porsîyonê cigerî biyo 500 lîra, la Stenbol de bi 400 lîra yo. Ma 6 merdim î, eger ma ci de ronişê dinyayêk pereyî şinî. Kîloya çayê qaçaq bi 300 lîra yo, la semavera çaye 800 lîra yo. No yew çikêko eceb o.”
