Meclîsê Ekolojîyî yê Amedî vera hewldayîşê talankerdişê Zozanê Hesendînî eşkerayî daye û dîyar kerd ke îqtîdar bi rayîrê madenî wazenı cografyaya Kurdîstanî talan biko û vat: “Destanê xo erdê ma ser o ra biancî.”
Şîrketê Anonîm ê Bazirganîya Teberî û Kanzakarî yê Pasûrî seba cigêrayîşê kanzayan bi hewayêko bêhuqûqî Zozananê Hesendînî de dest bi cigêrayîşê kananê madenî keno. Şarê Zozanê Hesendînî vera madenî dest bi çalakîya nobede kerda. Nobed aşmêk ra zafêr o dewam kena. Meclîsê Ekolojîyî yê Amedî û xeylê kesî şîyê zîyaretê nobede û tîya de eşkerayî ameye dayene. Hemverfekê Meclîsê Ekolojîyî yê Amedî Sebrî Kiliç eşkerayî wende. Eşkerayî vernîya Zîyareta Bavê Hazir de ameye dayene.
‘Îqtîdar bi destê madenî xozaya ma talan keno’
Sebrî Kiliç dîyar kerd ke serra 2008î ra şarê Pasûrî vera madenî erdê xo paweno û wina vat: “Serranê 90î de encamê polîtîkayanê şerî de dewê ma ameyê veşnayene û dewijan koçî şaristanan kerd. Ewro reyna îqtîdar bi destê sermaye û madenî dewe, xoza û cuya ma talan keno û reyna wazeno şarê ma koçber bikero. No madeno ke yeno waştene ke Zozanê Hesendînî de bêro awankerdene, do tena Pasûrî ser o tesîr nêkero, do tesîrê heme herême bikero. Do no maden gelî, ko, newal û erdanê û çemê ma ziwa bikero. Cografyaya Kurdîstanî de bi rayîrê madenî, projeyanê GES û HESan yena talankerdene.”
‘Zozanê Hesendînî yê ma yo, do yê ma bimano’
Sebrî Kiliç dîyar kerd ke no maden virazîyo do goristan û zîyaretanê herême zî bêrê rijnayene û vat: “Ewro cografyaya Kurdîstanî talanê ekolojî est o. Ewro behsê aştî yeno kerdene la no talan hema zî dewam keno, no şerm do ameyoxî de vejîyo vernîya ma. Aştî do azadîya xoza û heywanan zî bîyara ca. Aştî nêra cografyaya Kurdîstanî aştîya komelkî zî nêyena ca. Ma tîya ra vengdanê ke destanê xo erdê ma ra biancê. Ma vera sermayeya kapîtalîst têkoşînê cuyêka azade danê. Zozanê Hesendînî ye ma yê û do yê ma bimanê.”
