Hemserekê KNK’yî Karamusî îfade kerd ke şarê kurdî se serran ra zafêr o bê statu yo û vat: “Şarê kurdî tena bi wayîrvejîyayîşê yewîya xo ya neteweyî eşkeno ameyoxê xo asayî bikero.”
Hemserekê Kongreya Neteweyî ya Kurdîstanî (KNK) Ahmet Karamusî derheqê prosesê çareserî û muhîmîya yewîya kurdan de ajansê ANF’yî rê qisey kerd.
Karamusî da zanayene ke hinî muxatabîya Rayberê Şarê Kurdî Abdullah Ocalanî ameya qebulkerdene û vat: “Eşkera bi ke seba prosesêkê dîyalogan muxatabo verên Birêz Ocalan o.Vengdayîşê ey ser o PKK’yî kongreya xo awan kerde, qerarê qedînayîşê têkoşînê çekdarî girewt û bi nê hawayî dewrêkê neweyî da destpêkerdene.”
Karamuso ke 11ê temmuze tewrê merasîmê îmhakerdişê çekan 11ê vat: “Merasîm gamêka tarîxî bîye. Hetê kurdan mojna dinya ke ê seba aştî, sîyasetê demokratîkî amade yê. Na hemle teslîmîyet nêbîye; birêka strayejîke bîye ke Têgêrayîşê Azadîye bi îradeyê xo girewta.”
Karamusî bale ante ser ke Kurdîstan hetê cografya ra cayêkê strayejîkî de yo û vat: “Hêrişê vera herêmanê gaz û petrolî yê Başûrê Kurdîstanî nimûneyê ney ê. Hukmatê Iraq û Îranî estbîyayîşê kurdan ê sîyasî û statuyê înan qebul nêkenê. Rojawan de hukmatê HTŞ’yî keno ke Îdareyê Xoserî çin bikero. Hêrişê vera dûrzîyan, elewîyan ûsn. armanc kenê ke verê hêrişê vera kurdan bêro akerdene. Ganî kurdîstanijî bi xurtî wayîrê Rojawanî, şarê ci û Îdareyê Xoserî vejîyê.”
Karamusî derheqê gef û hêrişanê serê Vakur, Başûr, Rojawan û Rojhelatê Kurdîstanî de vat: “Rayîrê xoresnayîşêkê çareserîyêka manadare û menda ya şarê kurdî stratejîya hempare û yewîya neteweyî ya. Heqê kulturel, komelkî û sîyasî yê çar hetanê Kurdîstanî bi nê hewayî eşkenê bêrê destvistene û pawitene.”
