Rayedarê dewlete û cedevanî pîya xozaya Şirnexî talan kenê. Cerdevanî bi çimdarîya rayedaranê dewlete daristananê Besta û Mêrgûmarî birnenê û xoza talan kenê.
Kurdîstan de û bi taybetî zî Şirnex de her roje xoza yena talankerdene. Koyanê Cûdî û Heftenînî de bi serran o kanê komirî yenê akerdene, koyî yenê rijnayene û bi hezaran darî yenê wekerdene. Serranê peyênan de Koyê Gabarî de seba gêrayîşê petrolî bi hezaran darî yenê birnayene. Talanê xoza yê seba petrol û komirî ra vêşêr bi manaya ewleyîye daristanê koyanê Gabar, Cûdî, Herekol, Heftenîn û herêmanê Besta û Mêgûmarî bi destê rayedaranê dewlete û cerdevanan yenê birnayene.
Bi taybetî birnayîşê daranê dewa Cilbîya û Bilga yê mîyanê Koyê Cûdî û herêma Besta û Mêrgûmarî dewam keno. Hewteyêk ra ver sey Ajansê Welat ma kewtê mîyanê Koyê Cûdî û vîdeoyê daristanê şaristanokê Sêgirgê ke bi destê cerdevanan ameyêne birnayene, weşanaybî.
