Heyeto çarçewaya kampanyaya “Ez wazena Abdullah Ocalanî bivîna” amebi Stenbol, deklerasyonêk da. Heyetî deklerasyonî de vengdayîşê gameeştişî hukmatê Tirkîya kerd û vat: “Seba ke proses serkewo ganî birêz Ocalan û heme girewteyê sîyasî bilez û bêşert veradîyê.”
Welatanê cîya yê Ewropa ra 39 kesî çarçewaya kampanyaya “Ez wazena Abdullah Ocalanî bivîna” vizêr ameyê Stenbol. Heyeto ke rojnameger, nuştox, akademîsyen, sendîkaker, parlamenter û hiqûqnasan ra ameyêne pê, otêlêkê Taksîmî de kombîyayîşê “Maseya Gilovere” organîze kerd. Salona kombîyayîşî de pankartê “Pêvînayişo mîyanneteweyî yê seba çareserîya aştîyane ya meseleyê kurdî û qedênayîşê tecrîdî” ame aliqnayene.
Hemverfeka Kogreya Demokratîke ya Şaran (HDK) Meral Daniş Beştaş, Hemserekê Pêroyî yê Partîya Herêman a Demokratîke (DBP) Keskîn Bayindir û Têgêrayîşê Cinîyanê Azadan (TJA) ra Sebahat Tuncel zî tede xeylê kesî beşdarê kombîyayîşî bîyê.
Deklerasyon bi tirkî û îngîlîzkî ame wendene.
Deklarasyon wina yo:
“Heqê şarê kurdî bi hewayêko sîstematîk binê zilm û hêrişan de yê. Şarê kurdî her tim proseso demokratîk ê Tirkîya ra qewirîyenê. Ma tîya paştîya xo seba şarê kurdî dîyar kenê.
Ma veng danê ke rayedarê Tirkîya derheqê muzakereyanê aştî û dîyalogî de heme hetanê şarê kurdî reyde gamanê şênberan bierzê.
Ma vengdayîşê xo hema şaranê Tirkîya, têgêrayîşê averperwer û partîyan rê kenê ke seba ke no prosesê aştî serkewo, bixebitî.
Tena bi angajmananê winasînan bedilîyayîşêko mende û domdar eşkeno bêro kerdene û rayîrê Tirkîyayêka demokratîke eşkeno bêro akerdene.”
Nê prosesî de ganî Tirkîya wezîfeyanê xo yê mîyannetewî yê rêzgirewtiş, caardişê heqanê merdiman ê heme merdimanê mîyanê sînoranê xo de bîyara ca. Demêko de ke asta mîyanneteweyîde rewşa bi dişmentî û hêrişkarîya ra hîna zaf aseno, îmkanêko tarîxî keno ke meseleyê kurdî bi rayîrê dîyalog û dayîşûgirewtişan bêro çareserkerdene. Nê her di hêmanê bingeyînî yê her komelêka demokratîk ê. Demêko de ke Rojhelatê Mîyanên mîyanê adirî de yo û xeylê welatî pêşbazîyêka çekan a bêsînore de yê, birêz Ocalan venganê tewr xurtan ra yew o ke aştî û bêçekbîyayîşî herême de paweno. Birêz Ocalan vengdayîşêko bicesaret û wextê xo de kerd seba ke bêçekbîyayîş û xofesihkerdiş bibo, seba çareserîyêka aştîyane û demokratîk seba pirodayîşêko ke çewres serran ra zafêr o dewam keno.
Ma vîzyonê konfedarîlîzmo demokrarîk ê birêz Ocalan û pêşnîyarê ey o hîra seba tena seba Tirkîya nê seba Rojhelato Mîyanên la seba pêroyî herême sey modelêk nas kenê.
Seba ke proseso demokratîk bireso potansîyelê xo yo pêroyî, zaf muhîm o ke birêz Ocalan û heme girewteyê bîn ê sîyasî yê ke heqê înan ê merdimîye ameyê binpaykedene, bi lez û bêşert veradîyê. Domnayîşê girewtişê înan fikaranê cidîyan vejeno orte. Rêzgirewtişê heqanê merdiman demê girewtişî de zaf muhîm o. Bi taybetî tecrîdo 26 serran ke Girawa Îmrali de birêz Ocalan ser o yo û mehrûmkerdişê ey o heqanê bingeyînan ra bi hewayêko neqanûnî pîvananê hiqûqî yê neteweyî û mîyanneteweyî binpay keno.
Sey komêka çalakîkeranê mîyanneteweyîyan û sey akademîsyen, sîyasetmedar û pisporê heqanê merdiman, ma vengdanê hukmatê Tirkîya ke wezîfeyanê xo yê çarçewaya qanûnanê mîyanneteweyî yê heqanê merdiman û hiqûqê merdimîye de bîyaro ca. Ma vengdanê hukmatê Tirkîya ke goreyê prensîbanê edalet, demokrasî û aştî têbigêro.
Ma do çimdarîya gameeştişê hukmatî bikerê û ma hêvî kenê ke Tirkîya do bikewa bedilîyayîşêko rastîn ver bi komelêko rastî yê demokratîk û hîra.”
