Hemserekê DBP’yî yê Amedî Ahmet Doganî îfade kerd ke şerê Îsraîl û Îranî sere de vera Tirkîya verê pêro herême tehdît o û vat ke çareserî paradîgmaya ‘Komelê Demokratîkî’ ya Abdullah Ocalanî ya.
Hemserekê DBP’yî yê Amedî Ahmet Doganî derheqê şerê mabênê Îsraîl û Îranî de ajansê ANF’yî rê qisey kerd.
Doganî pare kerd ke Rojhelatê Mîyanênî qewimîyayîşî bi lez benê û vat: “Rojhelatê Mîyanênî de dîzaynêko newe est o, paradîgmaya dewleta neteweyî îflas kerd. Seke zanîyeno ke şerê Korfezî Filîstîn, Sûrîye, Iraq û Lubnan de dewam kerd. Bi pirodayîşê Îsraîlî yê vera Îranî lingo hîrêyîn ê dîzaynkerdişê Rojhelatê Mîyanênî virazîyeno. Her kes zaneno ke Îsraîlî çira dayo Îranî ro. Teşrîna verêne de Devlet Bahçelîyî destê xo dergê Koma DEM Partî kerd; çunke o zî ney ra qerqilîyayêne. Dima bi vengdayîşê Rayber Apoyî yê 27ê Sibate PKK’yî qerarê verdayîşê çekan girewt.”
Doganî îfade kerd ke şerê Îsraîl û Îranî sere de vera Tirkîya verê pêro herême tedît o û vat: “Îqtîdarê Tirkîya zî vat ke şer verê berî de yo. Qiseyê ke vanê şer seba Tirkîya gef o, zêdîyeno. Tek rayîro ke do Tirkîya zerarî ra bipawo, caardişê aştîyêka cidî ya bi kurdan o. Ganî herinda şerî de huqûqê way û birayîye bêro caardene. Eke Tirkîya na game bierza, hinî do bieşka xo bixelisna.
Rayber Apo na babete de samîmî yo. Paradîgmaya ‘Komelê Demokratîkî’ do aramîye bîyara şaranê Rojhelatê Mîyanênî. Seba Rojhelatê Mîyanênî, Tirkîya û Îsraîlî û pêro dewlet û şaran rayîrê xelisîye paradîgmaya Rayber Apoyî ya.”
Doganî da zanayene ke no şer zî çareserîya meseleya kurdan ferz keno û vat: “Dewlete naye hol zana ke sozê Rayber Apoyî teqez o. Rojhelatê Mîyanênî de tena bi qiseyê Rayber Apoyî yeno bawerkerdene. Ganî Tirkîya hîna zaf erey nêkewa. Eke Tirkîya kurdan reyde têkilîyan awan bikera do bixelisîya. Nêbo seba ci rîsk zaf o.”
