Avûkat Yusuf Çakasî îfade kerd ke seba averşîyayîşê prosesî ganî azadîya Rayberê Şarê Kurdî Abdullah Ocalanî bêra caardene û dîyar kerd ke gamê serê heqê hêvî seba aştî do biba gama pîle.
Mehkemeya Heqanê Merdiman a Ewropa (MHME) 2014î de qerar dabi ke cezaya muebede ya girankerda ya vera Rayberê Şarê Kurdî Abdullah Ocalanî çarçewaya ‘heqê hêvî’ de wa newe ra bêra erjnayene. La Tirkîya qerarî nêard ca. MHME’yî wextêk seba caardişê qerarî dabî Tirkîya ke no wext êlula 2025î de do biqedo.
Endamê Şubeyê Amedî yê Komîsyonê Zîndanan ê Komela Huqûqnasanê Azadan (OHD) Yusuf Çakasî derheqê babete de ajansê ANF’yî qisey kerd.
Çakasî da zanayene ke pêro dinya de nêzdîbîyayîşê verê girewteyanê edlî û sîyasîyan cîya yê û cezayê sey îdam û muebedî seba girewteyanê sîyasîyan ameyê caardene. Çakasî vat: “Dima ke Birêz Abdullah Ocalan teslîmê Tirkîya amebi kerdene cezaya îdamî wedarîyabî û herinda ci de cezaya muebedo girankerde amebî ardene. La cezaya muebedo girankerde goreyê peymananê mîyanneteweyîyan binpaykerdişê heqanê merdiman o. Heqê hêvî zî seba veradîyayîşê girewteyanê muebedan o.
Tirkîya de verê girewteyanê sîyasîyan de rejîmêkê înfazî yo taybet yeno caardene. Ma nîqaş kenê ke ganî pêro kesî heqê hêvî ra îstîfade bikerê. Serekê muxalefetê nîjadperestî Devlet Bahçelîyî bi xo babeta heqê hêvî arde rojevê Meclîsî. Nika nê atmosferî de heqê hêvî yeno nîqaşkerdene. Xora bi vengdayîşê 27ê sibate zî proses vurîya. Eke heqê hêvî seba Birêz Ocalanî bêro caardene no do bibo firsend ke çareserîya meseleyê kurdan de gamêka pîle bêra eştene.”
Çakasî dîyar kerd ke seba averşîyayîşê prosesî ganî azadîya Rayberê Şarê Kurdî Abdullah Ocalanî bêra caardene û vat: “Qiseyê Bahçelîyî yê heqê hêvî û caardişê heqê hêvî ser o yenê manaya caardişê şertanê azadîya Ocalanî û awankerdişê aştîya herême. Ganî ma bi cidîyet nêzdîyê na mesele bibê. Ma dewrêko muhîm de yê. Heqê hêvî seba aştî û komelo demokratîk muhîm o. Komel de na babete de pawitişî est ê. Caardişê komelê demokratîkî pabesteyê azadîya Ocalanî yo.”
