Meclîsê Cinîyan ê DBPyî bi şîarê ”Ma sey cinîyan ê rêxistinbîyayeyan û azadan, komelê azadî awan bikerê” Konferansê Cinîyan o 3in viraşt.
Meclîsê Cinîyan ê DBPyî bi şîarê ”Ma sey cinîyan ê rêxistinbîyayeyan û azadan, komelê azadî awan bikerê” Konferansê Cinîyan o 3in viraşt. Konferans bînaya DBPyî de ame kerdene. Sere de Hemsereka DBPyî Çîgdeme Kiliçgun Uçar, temsîlkarê partîyan, rêxistinê komelê sivîlî û xeylê cinîyî tewrê ci bîyî.
Konferans de hêverî Hetkara Hemsereka Pêroyî ya DBPyî Narîne Gezgor qisey kerd. Narîne îfade kerd ke têkoşînê cinîyan ê kurdan û cinîyanê dinya vera hêrişan dewam keno. Narîne vat: ”Felsefeya ‘Jin, Jiyan, Azadî’ rayîrê ma roşnî kena.”
Dima Vervatoxa Meclîsê Cinîyan ê DBPyî Bêrîvane Bahçecî qisey kerd. Bêrîvane bale ante serebûtanê Sûrîye ser û vat: ”Şerê Dinya yo Hîrêyîn Rojhelatê Mîyanênî de yeno kerdene. Tek çareya nê şerî caardişê paradîgmaya neteweya demokratîke yo. Rojawan de serkêşîya cinîyan de şorişêk ame kerdene. La nika cergê HTŞyî bi destekê Dewleta Tirke hêrişê cinî û domanan kenê. Ma venga îqtîdarî danê ke xeyalanê xo yê serê Rojawanî ra gek vera bido, cerganê xo Rojawanî ra apey bianco û Sûrîye ra vejîyoo.
Îqtîdarê AKP-MHPyî cara dişmenîya vera Kurdan ser o sîyaset keno. Hetêkî ra hêrişê kurdan keno hetê bînî ra qeyûman tayîn keno. Ewro Mêrdîn, Colemêrg, Êlih, Xalfetî, Dêrsim û Miks de bi rayîrê qeyûman huqûqê kolonyalîstan yeno caardene. Hêrişê vera destkewteyanê cinîyan hetê qeyûman ra yenê kerdene.
Dewleta Tirke û îqtîdarê AKP-MHPyî vera cinîyan ê Kurdan polîtîkayanê şerê taybetî kenê. Ma vera nê polîtîkayan prosesê 25ê Teşrîna Peyêne de kar û xebatî kerdî. La kişîyayîşê cinîyan her ke şino zêdîyenê. Ma do vera îtîfaqê camêrdan ê gemarinî Konfederalîzmê Demokratîkî yê Cinîyan ê Dinya awan bikerê. Qet yew hêz nêeşkeno îradeyê ma bişikno.
Îqtîdarî nê menganê peyênan de nîqaşê neweyî dayî destpêkerdene û wazeno ke dîzaynê neweyî bikero. Ma bi zelalî anê ziwan ke haştîye wazenê. La seba haştîye û çareserîya meseleya Kurdan rolê Birêz Abdullah Ocalanî girîng o. Coka ganî ma seba azadîya Ocalanî têkoşînê xo hîna xurtêr bikerê. Ganî ma vera ferasetê camêrdan têkoşînî pîlêr bikerê. Seba ney zî hêverî rêxistinîya cinîyan û pawitişê komelî rê girîngîye bidê.”
