Welatijê Amedî derheqê xofesihkerdişê PKK’yî û gamenêeştişê dewlete dîyar kerd ke PKK’yî û Rayberê Şarê Kurdî Abdullah Ocalanî game eşte, ganî êdî dewlete gaman bierza.
Rayberê Şarê Kurdî Abdullah Ocalanî 27ê sibate de vengdayîşê “Aştî û Komelo Demokratîkî” kerd. Vengdayîşî ra pey Partîya Karkeranê Kurdîstanî (PKK) 12ê gulane de netîcenameya kongreya xo eşkera kerd û dîyar kerd ke xo fesih kerdo. Gameeştişê PKK’yî ra pey şarê kurdî zî wazeno dewlete gaman bierza. Welatijê Amedî derheqê prosesî de ajansê ma rê qisey kerd.
‘Ganî birêz Abdullah Ocalan û heme girewteyî veradîyê’
Welatija bi namaeyê Senîha Çîftçî dîyar kerd ke ê aştîyêka birûmete wazenê û wina vat: “Ma aştî wazenê, aştîyêka ke heme hepisxaneyî vengî wazenê. Birayê mi zî no 27 serrî yo hepisxane de yo. Ganî sere de birêz Abdullah Ocalan azad bibo û dima heme hepisxaneyî veng bibê. Ez wazena maya gerîla û leşkeran êdî nêbermê. Senî ke dinya de heqê şaranê bînan est ê, ganî heqê şarê kurdî zî est bî.”
‘Wa Serekê ma veradîyo’
Welatijo bi nameyê Mehmet Gultekîn dîyar kerd ke ê nêwazenê ne mayê gerîla ne zî mayê leşkeran bibermê û win vat: “Ma vanê êdî bes o. Wa aştî bêra ca, eke aştî bêra ca do her kes zî mîyanê aramî de biciwîyo. Heta key do mergî bibê? Ganî girewteyê ma veradîyê, Serekê ma veradîyo. Eke ê veradîyê ma do bizanî ke do aştî biba. Eke şer dewam bikero, no proses nêreseno encam. Ma nêwazenê ciwanê ma êdî bêrê kiştene. Hetêkî ra vanê aştî hetêkî ra zî vanê ma do pirodê, ma şima qebul nêkenê. Kurdî ewro se ra se aştî wazenê. PKK’yî xo fesih kerd, êdî ganî gamî bêrê eştene. Bi kiştişî no problem çareser nêbeno.”
‘Wa ziwanê Kurdkî bibo ziwano fermî’
Welatijo bi nameyê Mustafa Yalçin zî ard vîrî ke şer de şarê kurdî gelekê bedêlê giranî dayê û vat: “Demo ke aramî est ba şar mîyanê aramî de ciwîyenı. Îqtîdar ganî gaman bierzo seba ke şar aştî wazeno. Ganî girewteyî veradîyê. Wina bo ma do vajê aştî do bêro ca. Ziwanê ma êdî vîndî beno, gedeyê ma êdî Kurdkî qisey nêkenê. Wa ziwanê Kurdkî bibo ziwanê fermî. Eke no bibo ziwanê ma do aver şêro.”
‘Dora gameeştişî ya dewlete ya’
Welatijo bi nameyê Medenî Akyildiz zî da zanayene ke kesî ke aştî nêwazenê şer raa hes kenê ê wina qisey kerd: “Ma nêwazenê ne şarê ma ne zî kesêko bîn êdî bêro kiştene. Bes o êdî hende gonî ameye rişnayene. No 40 serrî yo şer est o. Gamî bi hewayêko hempar yenê eştene. Bi yew hetî gamî nêyenê eştene. Ganî girewteyî veradîyê. Xeylê kesî est ê ke bêsuc yenê girewtene. Ganî heqê ziwanê ma bêrê dayene. Nê ziwanî kes nêdayo ma, ziwanê ma çîyêko rotişî nîyo. Kam ziwanêk înkar bikero, estbîyayîşê xo înkar keno.”
