Çawişo westa ke dewa Hoserî yê Cizîrî de cinîyêk kiştbî, dadgehe de serbest ame veradayene. Mabênê 2009 û 2019î de zî 17 kesî bi erebeyanê zirxîyan ameybî kiştene û kiştoxî ameyê veredayene.
Çawişo westa Emre S. dewa Hoserî ya Cizîrî de welatija bi nameyê Ayşe Coşkun kişte. Çawişo westa dewa Hoserî ya Cizîrî ya Şirnexî 26ê gulane de pê erebeya xo da Ayşe Coşkun ro û aye kişte. Emre S. dima ke pê erebeya xo da Ayşe Coşkun ro, Ayşe Coşkun cayo de ke hedîse tede qewîmîyaye, cuya xo vîndî kerde. Çawişo westa Emre S. ame destbendkerdene û dima ra ey sewqê dozgerîye kerd. Dozger riyê sucî “Bi qûsirê xo bîyo sebebê mergî” bi waştişê girewtişî sewqê Dadgerîya Cezayanê Sulhî yê Nobedar kerd. Dadger zî bi şertî “qedexeyê vejîyayîşê teberî” qerarê veradayîşî seba çawişê westa da.
Verî zî xeylê leşker, polîs û çawişanê westayan Kurdîstan de bi erebeyanê zirxî welatijî kiştbî û pêro serbest ameyê veradayene.
Kiştox serbest yenê veradayene
14ê hezîrana 2017î de zî qezaya Licê ya Amedî de pê erebeya zirxî da extîyara 85 serra Pakîze Hazar ro. Çawişo westa S.K wextêk ra dima girewte ame muhakemekerdene, serbest ame veradayene.
Bawkal û torinî kişt
Polîsan 11ê êlula 2019î de bi erebeya zirxîne payê Efe Tektekîn a 6 serra kerd û aye kişte. 6ê hezîrana 2018î de erebeyêka bîn a zirxîne ya polîsan a bi nameyê TOMA payê bawkalê Efe Mehmet Efe yo 85 serre kerd û ey kiştbi.
Goreyê daneyanê Şubeya ÎHD’yî ya Amedî heta 2019î de 10 serranê peyênan de encamê paynayîşê erebeyanê zirxînan de herême de 17 kesî ameyê kiştene. Riyê kesê sucdarî nêyenê cezakerdene, bi erebeyanê zirxînan merdiman kişenê.
