Hemverfeka Înîsîyatîfê Yewîya Demokratîke Gulcan Kaçmaz Sayyîgît “Konferansê Parlamenteranê Cinîyan ê Kurdî” de qisey kerd û vat: “Yewîya neteweyî ya şarê Kurdî ya, ya cinîyanê kurdan a. Do teqez bêro ca.”
Konferansê Parlamenteranê Cinîyan ê Kurdî yo 1. ke bi pêşengîya Têgêrayîşê Cinîyanê Azadan (TJA) Amed de yeno kerdene û do di rojan dewam bikero, Merkezê Kongreyî yê ÇandAmedî de dest pêkerd. Kurdîstan, Rojhelato Mîyanên û Ewropa ra xeylê parlameneterê cinî ê kurdî beşdar bîyî.
Salona konferansî de bi ziwanê Kurdkî, Tirkî û Erebî pankartê “Cinî sîyaseto demokratîk rayra benê, komelo demokratîk awan kenê”, “Cinî cuye azadî” û “Eke cinî azad nêba komel zî azad nêbeno” ameyê aliqnayene. Konferans rêzgirewtiş reyde dest pêkerd. Hemsereka Înîsîyatîfê Yewîya Demokratîke Gulcan Kaçmaz Sayyîgît konferansî de qisey kerd.
Cinîyan bi ‘Cinî cuye azadî’ vengê xo berz kerd
Gulcan Kaçmaz Sayyîgît dîyar kerd ke konferansê înan tarîxî yo û vat: “Ê ke eşkenê bêrê û ê ke nêeşkenê bêrê rihê înan tîya de yo. Riyê sînoran ra tayê embazê ma yê ke dewlete destûr nêdayo bêrê, est ê. Ma înan rê silamanê xo erşawenê. Ma Leyla Guven, Semra Guzel, Pexşan Ezîzî û xeylê embazê ma yê ke zindanan de xover danê, ma silamanê xo înan rê erşawenê.”
Dewamê qiseykerdişê xo de Kaçmaz bale ant şert û mercanê şarê kurdî ser o ke tede ciwîyenê û nê çîyî vatî: “Cinîyê kurdî xeylê zehmetî antê. Netewe dewletan hîrê rayîrê nîşanê înan dayê. Yo ewilin; şarê kurdî 4 parçeyan ser o vila kerdê. Yo diyîn; şarê kurdî çin hesibnayî û înan rê asîmîlasyonî ferz kerd. Yo hîrêyin zî nêverda kurdî bêrê têhet û yewîya xo ya neteweyî awan bikerê. La ma sey parlamenterî ewro do seba yewîya xo bixebitî. Ganî ma wayîrê vatişî ke tîya de yenê kerdene, qerarî ke tîya de yenê dayene, vejîyê. Eke ma ci rê wayîr vejîyê, ma do yewîya xo awan bikerê. Senî ke cinîyanê kurdan bi ‘Cinî cuye azadî’ vengê xo dinya de berz kerd, ez na bawerî de ya ke tecrubeyê embazanê ma zî do encamêko baş vejo orte.”
‘Do yewîye teqez bêra ca’
Gulcan Kaçmaz Sayyîgît bale ant “Vegdayîşê Aştî û Komelo Demokratîk” ê Rayberê Şarê Kurdî Abdullah Ocalanî ser o û vat: ”Birêz Ocalan demo ke vengdayîşî ‘Aştî û Komelo Demokratîk’ kerd, heme dinya de no vengdayîş gulbang da. Ma cinî ganî seba komelo demokratîk xebatanê xo pîl bikerê. Berpirsîyarîyê ma pîl î. Ganî ma wayîrê qeraranê nê konferansî vejîyê. Ma zihnîyetê camêrd-dewlete, polîtîkayanê înan parçe bikerê. Yewîye ya şarê kurdî ya, ya cinîyanê kurdan a. Ma do teqez bîyarê ca.”
Qiseykerdişê destpêkî ra pey, sînevîzyono ke têkoşînê cinîyanê kurdan mojneno, ame temaşekerdene.
