Dayîkî ke Amed de beşdarî vîrardişê awankerdoxanê PKK’yî Alî Haydar Kaytan û Riza Altunî bîyî, dîyar kerd ke bi şehadetê înan xemgîn î û waşt ke aştî bêro ca.
Partîya Karkeranê Kurdîstanî (PKK) 12ê gulane de encamnameyê kongreya xo ya 12. eşkera kerd û şehadetê di pêşeng û awankerdoxanê xo Alî Haydar Kaytan û Riza Altunî dîyar kerd. Kongre dîyarî Alî Haydar Kaytan û Riza Altun ameye kerdene. Eşkerayîya PKK’yî ra pey xeylê şaristanan de Alî Haydar Kaytan û Riza Altun ameyê vîrardene. Amed de zî bi pêşengîya MEBYA-DER, DEM Partî, DBP’yî bi beşdarîya xeylê kesan pêşengê PKK’yî Qada Şêx Seîdî de ameyê vîrardene. Bi hezaran kesî beşdarî vîrardişî bîyî. Welatijî ke beşdarê vîrardişî bîyî ajansê ma rê qisey kerd.
‘Ma zaf xemgîn î’
Dayîka bi nameyê Sadîke Akdag da zanayene ke seba vîrardişî Mersîn ameya û wina vat: “Ma ewro seba her di pêşengan tîya de yî. Ez zaf xemgîn bîya, înan xeylê serran têkoşîn da. Ma wazenê mîyanê aştî û têduştî de biciwîyê. Ma wazenê hepisxaneyî veng bibê.”
‘Ganî dewlete xî zelal ba’
Dayîka bi nameyê Aycan Metîn zî dîyar kerd ke ê êdî şer nêwazenê û wina vat: “Ma wazenê êdî aştî bêra. Wa dayîkê gerîla û leşkeran nêbermê. Êdî bes o, wa ma nêxapênê. Ez wazena Serokê ma azad bibo, heme hepisxaneyî veng bibê. Waştişê ma zelal o, ganî dewlete zî zelal ba. Amancê ma vindarnayîşê şerî yo. Ma heqê ziwanê xo û azadîya xo wazenê. Ma dewlete ra bawer nêyî. Seba ke bawerîya ma ci ra biba, ganî hepisxaneyî veng bibê û ziwanê Kurdkî bibo ziwanê fermî.”
‘Ma wazenê Serokê ma azad bibo’
Dayîka bi nameyê Hedîye Yilmaz zî dîyar kerd ke a Mersîn ra seba aştî ameya vîrardişî û wina vat: “Ma zaf xemgîn î. Homa heqê înan erdî de nêverdo. Ma ewro seba hema girewteyan tîya de yê. Ma wazenê berê hepisxaneyan abîyê û veng bibê. Ma wazenê Serokê ma azad bibo.”
‘Wa êdî tu kes nêro kiştene’
Dayîka bi nameyê Zêrîn Ateş zî dîyar kerd ke Silopya ra ameyê vîrardişî û wina vat: “Ma vanê êdî bes o. Wa êdî tu kes nêro kiştene. Ewro hepisxaneyî pirr î. Ma wazenê heme girewteyî veradîyê.”
