Bi hezaran kesan awankerdoxê PKK’yî Alî Haydar Kaytan û Riza Altunî Qada Şêx Sêîdî ya Amedî de ard xo vîr. Vîrameyîşî de wina ame vatene: “Pîrê Kurdîstanî bêmerg î. Ma soz danê ma do amancê înan bîyarê ca.”
Kadroyê pêşengî yê PKK’yî Alî Haydar Kaytan û Riza Altun Qada Şêx Sêîdî ya Amedî de ameyê vîrardene. Keyeyê Alî Haydar Kaytan û Riza Altun, Hemserekê Partîya Herêman a Demokratîke (DBP) Keskîn Bayindir, parlamenterê Partîya Têduştî û Demokrasîyî ya Şaran (DEM Partî), sîyasetmedara kurd Leyla Zana, rayberê rêxistinanê DEM Partî û DBP’yî yê qeza û şaristananê vakurê Kurdîstanî, hemşaredar, temsîlkarê sazîyanê sîvîl ê komelkî û bi hezaran kesî beşdarî vîrameyîşî bîyî.
Programê vîrardişî ra ver xeylê cinîyî ke şaristananê vakurê Kurdîstan û Tirkîya ra ameyê, Tek Kapi yê Sûrî de kom bîyê. Cinîyî ke pankartî “Sey rayîrnîşandayoxê daîmî do têkoşînê ma de biciwîyê” akerd, sloganî “Şehîd namirin”, “Jin jîyan azadî” , “Jin jîyan azadî, azad bike Raybertî” , “Jin şer naxwazin, aştî dixwazin” vatî û ver bi Qada Şêx Seîdî rayra şîyê. Bi seyan kesî ke derûdorê qade de kom bîyê zî bi vatişê sloganan vîyartî qade. Reyna ciwanan pankartê “Têkoşîna wan rêya me ronî dike” akerd. Xeylê dayîkî bi mexmelanê xo yê kesk û sûre û zeran dekewtê qade. Qade de zî sloganê “Rêya şehîd rêya me ye, PKK partîya me” , “PKK gel e, gel li vir e” , “Bijî Serok Apo” vatî.
Vîrardiş 2 deqîqe rêzgirewtiş reyde dest pêkerd. Vîrardişî de Çerxa Şoreşî ameye wendene. Dima bi hezaran kesan bi yew veng sloganî “Şehîd namirin” vat.
