Hemserekîya Konseya Rayberdişî ya KCK’yî îfade kerd ke Sirri Sureyya Onderî têkoşînê di şaran kerd yew û vat semedê layîqbîyayîşê vîrameyîşê ey rayîro tewr raşt xurtkerdişê têkoşînê aştî û demokrasîyî yo.
Hemserekîya Konseya Rayberdişî ya KCK’yî badê şehadetê Endamê Heyetê Îmraliyî Sirri Sureyya Onderî mesajê serweşîye pare kerd û nê vatî:
“Ma bi dejêko pîl şehadetê Sirri Sureyya Onderî eşnawit. Rixmo ke rewşa ey girane bîye, sey pêrune ma zî pawitêne ke o bibo weş. Çi heyf ke wina nêbi. Ewlado erjîyaye yê şarê ma ke Tirkîya tira zaf çî pawitêne û heta nika semedê têkoşînê azadîye, demokrasî û aştî zaf çî kerd, çi heyf ke mîyanê ma ra vejîya, şi. Seba ke ma merdimêkê têkoşînî yo wina muhîm vîndî kerd, dejê ma gird o. Sere de keye û merdimê ci ma pêro heskerdox, dost, embazê ci yê karî, camîaya huner- sînema, DEM Partî û şaranê xo rê serweşîye wazenê, ey bi hurmet yad kenê.
Şehîdê aştî û demokrasîyî
Sirri Sureyya Onderî gama ke xebata zaf muhîme ya semedê aştî û demokrasîyî rayra berdêne nêweş kewt û çi heyf ke netîceya nê de dinyaya xo bedilnaye. Na mana de o şehîdê aştî û demokrasîyî yo. Sirri Sureyya Onder merdimê têkoşînêkê girdî yo. Sosyalîst, şorişgêr û welatperwer o. Cuya ci bi têkoşînê sosyalîzm, demokrasî û azadîye ravîyarte. Semedê nê bedelê giranî dayî. Taybetîya ci ya tewr muhîme zî aya ke sey serkêşê têkoşînê têgêrayîşê sosyalîstan û têkoşînê sosyalîzmî paştî daye têkoşînê şarê kurdî û neferêko muhîm ê nê têkoşînî bi. Ey cuya xo de têkoşînê wird hetan kerd yew û çîyo ke Tirkîya de tewr zaf yeno waştene ard ca. Reyna bi kesayetê xo yê hunermendî û xebatanê xo zî semedê averşîyayîşê komelkî xebatê muhîmî kerdî.
Xeta Mahîr û Yilmaz Guneyan temsîl kerde
Sirri Sureyya Ondero sînayeyo ke pê hûmartişî taybetîyê ci yê pozîtîfî nêqedîyenê, pê cuye, huner û têkoşînê sosyalîzm û demokrasîyî xeta Mahîr, Denîz, Îbrahîm û Yilmaz Guneyan bi heqê ci temsîl kerd û bi neferanê muhîman ra yew ke na xete roja ma de kirişeno. O menga şehîdan gulane de şehîd bi. Bi na wesîle ma şexsê ey de şehîdanê menga gulane û heme şehîdanê şoriş û demokrasîyî bi hurmet û mînetî yad kenê.
Gerek ma têkoşînê aştî û demokrasîyî ser bifînê
Sirri Sureyya Onderî yê sînayeyî xebeta aştî ya ke zaf muhîm a rayra berdêne, serkêşîya ci kerdêne. Tira hema pawitişê zaf gird bibî la xebatê ke heta ewro kerdî zî zaf gird bî û pîya bi embezanê xo yê xebate, xebatê aştî heta nuqtayêka muhîme ardî. Ma semedê şehadetê ci dejê pîlî biancê zî, semedê layîqbîyayîşê vîrameyîşê ey rayîro tewr raşt xurtkerdiş û serkewtişê têkoşînê aştî û demokrasîyî yo. Ma do semedê caardişê nê xîret bikerê. Ma veng danê ke wa her kes têkoşînê Sirri Sureyya Onderî bigîro ermeyanê xo ser o û semedê serekwtişê ci zaf xîret bikero.”
