Parlamentoyê Ewropa de bi sernameyê ‘Tirkîya de prosesê aştî, serebûtê rojaneyî û ameyoxî ra pawitişî’ panelêk ame kerdene. Qiseykerdoxan dîyar kerd ke ganî dewlete û îqtîdarê Tirkîya gamanê zelalan bierzê.
Merkezê Cigêrayîşanê Tirkîya (CEFTUS) Parlamentoyê Ewropa de bi sernameyê ‘Tirkîya de prosesê aştî, serebûtê rojaneyî û ameyoxî ra pawitişî’ panelêk ame kerdene.
Panelo ke Lord Matthew Elliottî moderatorîya ci kerde hetê xeylê nuştox, akademîsyen û sîyasetmedaran ra ame taqîbkerdene.
Prof. Dr. Mîthat Sancarî derheqê vengdayîşê 27ê sibate yê Rayberê Şarê Kurdî Abdullah Ocalanî û prosesê ey ra pey de qisey kerd. Sancarî pare kerd ke eke no proses serkewo pêro dinya rê do bibo nimûne. Sancarî vat: “Seba ke PKK qerarê çekronayîşî bigêra ganî bieşka ke rasterast lîderê xo de têkilîye rono. Vengdayîşê ‘Aştî û Komelo Demokratîkî’ yê Ocalanî asta tarîxî de yo. Seba serkewtişê nê prosesî ganî dewlete û îqtîdarê Tirkîya gamanê zelalan bierzê.”
Parlamenterê Partîya DEVA Mehmet Emîn Ekmenî zî îfade kerd ke ê sey partî paştî danê nê prosesî û vat: “Ganî sebebê şîdetê têkoşînê çekdarî orte ra bêrê wedaritene. Seba ney zî ganî çarçeweyêka polîtîke û qanûnî bêra viraştene. Nê prosesî de ganî Meclîs zî bi zelalî rolanê xo bîyaro ca.”
Şaredara Dêrsimî ya verêne Nurhayat Altun îfade kerd ke îdareyanê herêmîyan (şaredarîyan) rewşa şerî ra zerarê pîlî dîyê û ganî îdareyanê herêmîyan de paradîgmaya xeta demokratîke, ekolojîke û azadîya cinîyan bêra caardene.
