Şarê Dêrsimî vengdayîşê Rayberê Şarê Kurdî Abdullah Ocalanî erjna û va: “Ma kî wazenîme rindîye bêra. Heq firsetê xirabîye nêdo.”
Heyetê Îmraliyî yê DEM Partî 27ê sibate de vengdayîşê “Aştî û Komelo Demokratîk” yê Rayberê Şarê Kurdî Abdullah Ocalanî raya pêroyî rê eşkera kerd. Vengdayîşê tarîxî ra dima Kurdîstan, Tirkîya û dinya de, meydanan de û nê rojan de zî şayîya Newroze de wayîr vejîyayîşêde gird nîşan dîya.
Tarixê şaristananê Kurdistanî pêrûne de dîyayişê zilman, zoran, koçkerdişan, hepisbîyayîşan û kiştîşan est o. Şaristanê Dêrsimî zî tarixê xo de para xo nê dejan ra zêde zêde girewto. Naye ra şarê Dersimî her ca ra hîna zaf hesretê aştî yo.
Şarê Dêrsimî derheqê vengdayîşê Rayberê Şarê Kurdî Abdullah Ocalanî de ajansê ma (AW) rê qisey kerd.
Cinîya Dêrsimije Yadîgar Dogane bi kilmkî ma rê wîna va: “Ma zaf dî, zaf dî. Ma verî zaf ant çike ters bî. Ma nêtawrêne şime dewanê xo. Nêtawrêne şime serê mezelanê xo. Aştî bêra, rindîye rind a, xirabîye durî şêro.”
‘Ma vanîme rindîye bêro’
Kokimê Dêrsimî Emîna Çelîk û Riza Çelîkî pîya ma rê dejê xo, omidê xo ardî ziwan û nîya va: “Mîye û vergî têlewede biçerê, gêncî têlewede vindêrê, yaşlî têlewede vindêrê. Wexto ke dinya bena xirabin ke ma nêzanenê se beno. Ma nêwazenîme xirabin bo. Ma vanîme rindîye bêro. Heq firset xirabîye nêdo. Ma kî vanîme no bero ke mendo cenabê Heqî ci rê rindîye biyaro. Nika dewlete şona dewletanê bînan de şer kena cinazê subayan-eskeran ana, ma vênenîme zerê ma cirê diyax nêkeno. Zerê ma cirê dejeno. Handê gencî ameyî kiştene. Ma vatêne ma û wayê gencan berbayî, zîbayî, dima ra ame vêrnîya ma kî. Ma vanîme ke dinya rinde bo. A ke bîye, bîye şîye. Balê no bero ke teze yeno ver, no ber raxelesîyo. Ma wazenîme rindîye bibo, aştîye bibo. Esker kî wayîrê ma û pî yo, yê bînî kî wayîrê ma û pî yê. Rindîye ke bena gerê her kes para xo bigo. Her kes ke para xo bigo pîya birlixîye bena. Hukmat vano ‘tifanganê xo caverdê bêrê’ henî nêbeno. Gerê heqa înan kî bidîyo ci. Na handê gonî rişîye. Gerê heqa xo bigêrê.”
‘Dewanê ma gul û sosinî kerdê ya, bêrê dewanê xo’
Sevîm Dogane zî veng dana vana: “Ma vanîme ke kes mêyro kiştene. Qe kes meyro kiştene. Ma ceynikanê Dêrsimî zaf xirabîye dîye. Vanîme ke naye ra tepîya ma xirabîye mevînîme. Vanîme ke naye ra tepîya rindîye bivînime, weşîye bivînime. Dewanê ma gul û sosinî kerdê ya. Miletê ma wa bêro dewanê xo. Bêrê ma kulî bême têlewe. Se beno, en rindîye na nîya? En rindîye nawa.”
