Endama Meclîsê Parlamenter a Konseyê Ewropayî Laura Castel derheqê vengdayîşê Rayberê Şarê Kurd Abdullah Ocalanî de qisey kerd û da zanayene ke vengdayîş seba çareserî gamêka tarixî ya û ganî Tirkîya şertanê muzakereyî awan bikera.
Vengdayîşê ‘Aştî û Komelo Demokratîk’ yê Rayberê Şarê Kurd Abdullah Ocalanî hema zî veng dano û DEM Partî pêvînayîşanê xo yê bi komele û hetanê sîyasîyan reyde domnena.
Endama Meclîsê Parlamenter a Konseyê Ewropayî û Endama Meclîsê Temsîlkarya Îspanyayî Senatora Katalan Laura Caster Fort derheqê babete de ajansê JINNEWS’î rê qisey kerd.
‘Seba çareserî gamêka tarixî ya’
Laura Castel da zanayene ke Katalonyayî na gama tarixî pozîtîf ejnaya û vat: “Ma na game ra pozîtîf ewnîyenê. No vengdayîşêko bi erj û muhîm o. No eşkeno hukmato tirk seba aştî bikero têgerî. Goreyê mi vengdayîşê Birêz Ocalanî seba çareserîya demokratîke gamêka muhîm o.”
‘Ganî hukmato tirk êdî game bierzo’
Laura Castel dîyar kerd ke vengdayîşî ra pey gamêka şênbere nêameya eştene, tecrîd dewam keno û wina vat: “Ganî hukmato tirk çîyêk bikero. Seba ke êdî wext ameyo ke hukmato tirk gamanê demokratîkan bierzo. Derûdorêko demokratîk tena bi nê hewayî eşkeno bêro awankerdene. Ma derheqê prosesî de hêvîdar ê. Nê heme netîceyê têkoşînî de aver şîyê. Na reye tayê çîyî benê. Bi desan reyî hetê heme heyetanê aştî ra no waştiş ame kerdene. Netîceyê heme hewldayîşan de no netîce ame girewtene. Netîceyê nê de Abdullah Ocalanî reyde pêvînayîş ame kerdene.”
Ganî gama bîne çi ba?
Laura Castel derheqê nêzdîbîyayîşê şarê kurd yê nê prosesî de zî wina vat: “Sey şar şima zaf baş şonê. Şima serkewtê. Kuçeyan de bi hewayêko heqdar şima heqanê xo gênê. Tîya ra pey gama ke bêra eştene, seba girewtişê heqanê xo ya. Ez Katalan a û her tim hetê xoserîye de bîya. Ma zî wazenê bi hewayêko aştîyane xoser bibê. Bêguman nê prosesî zehmet ê la heqî eşkenê destûrê bingeyînî de bêro şinasnayene. Ganî şarê kurd seba xo qerarî bido û qederê xo tayîn biko.”
‘Ganî komelo mîyanneteweyî nê vengdayîşê bierjno’
Laura Castel dîyar kerdke no vengdayîş eşkeno heme dewletanê herême û Rojhelato Mîyanên ser o bikero û wina dewam kerd: “Ez tam nêeşkena vaja do senî tesîr bikero la teqez do tesîro xo est bî. Do tay çîyî bibedilîyê û ez hêvîdar a hetê aştî de bê. Xeylê aktorê terefgirê zilmî est ê. Seba ney zî ez hêvîdar a qadê mîyanneteweyî nê vengdayîşê aştîyane bierjnê.”
‘Hepisxane de muzakere nêbeno’
Laura Castel peynîya qiseykerdişê xo de nê vatî: “Ya tewr muhîme şima nêeşkenê hepisxane de muzakere bikerê. La ma vînenê ke şertan xo ferz kenê. Şima nêeşkenê hepisxane de muzakere bikerê. Seba ke şertî seyyewbîn nîyê. Ez hêvîdar a wextêko kilm de Birêz Ocalan bêro veradeyene.”
