Sîyasetmedara girewta Leyla Guven dîyar kerd ke problemê ke cinî ciwîyenê yew ê û vera ci ganî çareserîyêka radîkal awan biba û vat: “Vengdayîşê Aştî û Komelo Demokratîk destpêkê prosesêk o ke do cinî pêşengîya ci bikerê.”
Hemsereka verênê ya Kongreya Demokratîke ya Şarî (DTK Leyla Guven ke Hepisxaneyê Cinîyan yê Girewte yê Sîncanî de girewte ya seba 8ê Adare Roja Cinîyan a Dinya mektûbêk erşawit Ajansa Mezopotamya (MA) rê.
Çend parçeyî nameyê Leyla Guvene ra:
“Azadîye hişyarî ya, tena wexto ke ti hişyar bena, ti zanena ke ti çiqas bêemsal a. Cinî hem seba ke xo ra hişyar ê hem seba ke heme nêseypêyî ra hişyar ê, têkoşînêko bêemsal danê. Ez vana cinî hem problemî nê çarey hîra kenê. Tena bi îstatîstîkan qiseykerdişê cinîyan ke her ca de yenê kiştiş bes nîyo, ganî ma têkoşîn û serwedaritişî zêde bikerê.
‘Ganî xoverdayîş û çareserîyê radîkalî bêrê afirnayene’
Problemê ma rasterast camêrdan reyde nîyo, problemê ma bi zehnîyetê camêrdî reyde yo. Û seba naye ganî çareserîyê radîkalî bêrê viraştene û xoverdayîş bibo şerto ke nêeşkeno nêbo. Ma goşdarîya xebatanê xo bikerê ke şarî rê malûmatî rastî bêrê dayene, o wext her cinî do sey rojnamegerêk têbigêro. Her çiqas cinî nîmeyê şarî bê zî eke ê biwazê eşkenê bi serwedaritişê xo û têkoşînê xo dinya de ca bivurnê.
Cinîyê do ‘Vengdayîşê Aştî û Komelo Demokratîk’ rê pêşengî bikerê. Grûbanê xebate yê cinîyan rê xebatêka bi lez lazim a. Çunke ganî heme çekuyî û faktorê ke sîstemê camêrdî viraştê, tena bi edaleta ke cinîyî do awan bikerê, eşkenê safî bibê.
No 8ê Adare ra pey do cuyêka demokratîk, ekolojîk, azadîya cinîyan bido destpêkerdene. Her çend ma bi fizîkî girewte bê zî ruhê ma do 8ê Adare de qadan de şima hemînan reyde bo”
