Sazîyê çand û hunerî yê Amedî derheqê vengdayîşê Rayberê Şarê Kurd Abdullah Ocalanî de beyanat da û dîyar kerd ê vengdayîşê tarixî rê wayîr vejîyenê û ê do sey hunermendê şarî bi berpirsîyarîye têbigêrê.
Piştîdayîşê seba “Vengdayîşê Aşitî û Komelê Demokratîkî” yê Rayberê Şarê Kurd Abdullah Ocalanî dewam keno. Sazîyê kultur û hunerî yê Amed û Êlihî seba ke piştî bidê vengdayîşê tarixî Komela Kultur û Hunerî ya Dîcleyî ya Qezaya Sûrî de bi sernameyê “Hunermendî Piştî Danê Vengdayîşê Serdemî” kombîyayîşê çapemenîye organîze kerd. Zaf hunermendî beşdarê beyanatî bîyê.
Beyanatî bi kurdkî şanoger Omer Şahînî wend û bi tirkî zî wênesaz Neşe Toprak.
Beyanatê sazîyanê kultur û hunerî wina yo:
“Ma vengdayîşê Abdullah Ocalanî rê wayîr vejîyenê”
Sey hunermendê ke bi hêzê hunerî ra bawerî kenê û amancê înan aştîya komelkî ya, ma piştî danê vengdayîşê Aştî û Komelê Demokratîkî yê rêzdar Abdullah Ocalanî yê 27ê sibate. Huner ziwan û wijdanê şaran o. Ma hunermendî yê ke eseranê ke dejê merdiman sivik kenê, hêvîyanê înan gird kenê û waştişê înan ê azadîye dîyar kenê vejîyenê meydan. O semedî ra ma Vengdayîşo Seserre ke seba vindarnayîşê şerî, lejî û dibendîya komelkî ameyo kerdene, qîmetin vînenê. Vengdayîşê Aştî û Komelê Demokratîkî ke hetê Rêzdar Abdullah Ocalanî ra ameyo destpêkerdene rê wayîe vejîyenê.
Ma sey hunermendî rolê xo zanê
Awankerdişê sîstemê komelkî yê demokratîk ke goreyê prensîbanê azadîye, huqûq û edaletî yo, berpirsîyarîya ma ya pêrûnan a. Ma sey hunermendî nê prosesî de rolê xo zanê û ma şarê xo ra vanê ke ma amade yê ke bi heme hêzê xo yê hunerî wezîfeya xo ya komelkîkerdişê aştî bi ca bîyarê. Nê prosesî de ma reyna dîyar kenê ke ganî hukmat hessasîyetê rêzdar Ocalanî yê aştî rê, bi eynî hessasîyetî nêzdî bibo. Û sey yew muxatabê nê vengdayîşî ma berpirsîyarîya bingeyîne ya dewlete anê vîrê ci. Ma qîmet danê bingeya huqûqî û sîyasî ya ke rêzdar Ocalanî nîşan daya. Ma zanê ke tena ê zemînî ser o ma hunermendê kurdî eşkenê bi hewayêko azad bi huner, ziwan û kulturê xo biciwîyê.
Ganî her kes bi berpirsîyarî warzo
Na çarçewa de ma vengdanê heme parçeyanê komelî ke seba perspektîfê Aştî û Komelê Demokratîkî yê ke rêzdar Abdullah Ocalanî eşkera kerdo, bi berpirsîyarî têbigêrê. Ma seba ameyoxo azade ke mîyanê aştîyêka bi rûmet de geş beno, tîya de yê û heta ke komelêka demokratîke bêra awankerdene ma do têkoşînê xo bidomnê.”
