Platformê Yewîya Neteweyî ya Cinîyanê Kurdan netîcenameya kombîyayîşê xo yê vizêrî vila kerde. Kombîyayîş bi tewrêbîyayîşê cinîyanê her çar parçeyanê Kurdîstanî ame kerdene. Netîcename de ame dîyarkerdene ke yewîye û karê muşterek ê mabênê hêz û hetanê Kurdîstanî de garantîya bingeyêne ya pawitişê destkewteyan û resayîşê aştî, azadî û demokrasî ya.
20ê teşrîna peyêne de Silêmanî de kombîyayîşê Platformê Yewîya Neteweyî ya Cinîyanê Kurdan ame kerdene. Temsîlkarê cinîyanê her çar parçeyanê Kurdîstanî, şexsîyetê sîyasîyî, çalakîkerî û temsîlkarê rêxistinanê cinîyan tewrê kombîyayîşî bîyî. Amancê kombîyayîşî munaqeşekerdiş û parekerdişê fikiran bî; babetê kombîyayîşî problemê cinîyan, averşîyayîşê peyênî û rewşa sîyasîye ya herême bîyî. Sewbîna xebata seba qewetinkerdişê yewîya neteweyî ya cinîyanê Kurdan û hedrekarîyê Kongreyê Neteweyî yê Hîrêyin ê Cinîyanê Kurdan babetê bingeyênî bîyî.
Kombîyayîş badê munaqeşe û qîymetdayîşanê temaman vizêr şan qedîya. Netîcenameya kombîyayîşî raya pêroyîye reyde ame parekerdene.
Netîcename wina ya:
“Raya pêroyîye ya Kurdîstan û dinya, heme hêz û hetanê sîyasîyan, rêxistinanê komelê sivîlî û dezgehanê komunîkasyonî rê:
Herême û Kurdîstan qonaxêka hesas û tarîxî ra vîyarenê. Na qonaxe de, bi amancê qewetinkerdişê yewîya neteweyî, pawitişê destkewteyan, vera asteng û krîzan vindertiş û derbazkerdişê înan, asta heme parçeyanê Kurdîstanî de şaristanê Silêmanî de kombîyayîşê platformê ma ame kerdene. Badê munaqeşeyêka mesulîyetine û her hetî, tewrêbîyayoxan nê helwest û teklîfanê cêrênan ser o teqez kerd:
- Ma piştdayîşê pawitişê statuyê destûrî yê Herêma Kurdîstanî ya Federale kenê. Ma seba yewîya Şarê Kurdî û agêrayîşê ziwanê dîyalogî û sindoqanê weçînitişî sey rayîrê yewin ê çareserkerdişê problem û krîzanê zereyî xebitîyenê.
- Ma bi tu hawa nêbenê parçeyê parçekerdişê Herêma Kurdîstanî; ma piştdayîşê awankerdişê hukmatêko yewbîyaye yo demokratîk ê bingehhîrayî kenê ke binge de hemparîya raşte û heqê welatijîye bê.
- Ma piştdayîşê pawitiş û qewetinkerdişê sîstemê Îdareyê Xoserî yê Demokratîkî yê Rojawayê Kurdîstanî kenê, sey platformêk seba garantîkerdişê heqanê heme netewe û grûbanê etnîkan.
- Ma piştdayîşê înîsîyatîfanê çareserîya demokratîke û cewabdayîşê waştişanê Şarê Kurdî yê heme parçe û herêman de kenê. Ma komelê demokratîkî û heme hêz û hetan rê veng danê ke piştdayîşê prosesê çareserî yê Bakurê Kurdîstanî bikerê.
- Helwestê ma derheqê rewşa Rojhelatê Kurdîstanî de eşkera yo û nêvurîyeno. Na serre pêroyîyê Îranî de 700 kesan ra zêdeyêrî ameyî tepiştene û îdamkerdene. Coka ma wazenê ke seba vindarnayîşê nê cezayan û pawitişê cuya înan helwestê platformî eşkera û lezabe bo.
- Ma îfade kenê ke seba yewkerdişê xebatan û nêzdîbîyayîşê fikran, koordînasyon û karê muşterek ê ke partîyanê sîyasîyan, grûban û rêxistinan reyde yeno kerdene zaf muhîm o.
- Ma bi qewetî vera kiştişê cinîyan, xovêşnayîş û heme tewiranê şîdetî vindenê û ma qet hedre nîyê ke heqê cinîyan bibê qurbanê krîzanê sîyasîyan. Ma seba averberdişê cayê cinîyan û dewamê serkewtişan binê sloganê “Cinî, cuye, azadî” de heme parçe û herêmanê Kurdîstanî de xebitîyenê.
- Ma tewrêbîyayoxan û platforman agahdar kenê ke seba têkoşîn û waştişê pawitişê heq û destkewteyan, ma sey cinîyanê Kurdan piştdayîşê prosesê entegrasyonê demokratîkî kenê.
- Nê kombîyayîşî de ame îfadekerdene ke heme parçeyê Kurdîstanî heme qonaxan de ganî piştî bidê yewbînan û yew bê.”
- Zîyaretkerdişê heme partî û rêxistinanê sîyasîyan û kerdişê kombîyayîşêko hîra seba yewîya Kurdan.
- Hedrekarî seba kerdişê festîvalêka kulturî û hunerî asta pêroyîyê Kurdîstanî de.
- Kerdişê rêzeyêka çalakîyanê pîlan û hîrayan seba pawitişê destkewteyanê şorişê cinîye.
- Zêdekerdişê kar û têkoşînî seba yewîya Kurdan, bitaybetî seba Başûrê Kurdîstanî.
- Xebitîyayîş seba hedrekerdiş û kerdişê Konferansê Kurdan.
- Piştdayîşê yewvengîye warê komunîkasyonî de, binê sloganê “Cinî, cuye, azadî” de.
- Pawitişê heqanê qanûnîyan û bicaardişê edaletî seba cinîyanê Êzidîyan: Sucî sey jenosîdî bêrê naskerdene, sucdarî bêrê cezakerdene û kesê ke xelesîyayê hetê qanûnî, weşî û psîkolojî ra tazmînat bigîrê. Eynî wext de ganî vera şîdetê seksuelî û fîzîkî bêro vindertene, lekeya komelkîye bêro wedarnayene û Şengal de emnîyet û tewrêbîyayîşo aktîf ê sîyasî yê înan bêro garantîkerdene.
Peynî de, ma tekrar kenê ke yewîye û karê muşterek ê mabênê hêz û hetanê Kurdîstanî de garantîya bingeyêne ya pawitişê destkewteyan û resayîşê aştî, azadî û demokrasî ya. Ma hêvîdar ê ke heme hetî bi hîsê mesulîyetê tarîxî cewabê nê teklîfan bidê û seba bicaardişê înan gamê pratîkî bêrê eştene.”











