Qetilkerdişê Ugur Kaymaz o ke 12 serre bî û ebi 13 guleyan terba pîyê xo Ahmet Kaymazî reyde ame kiştene ser de 22 serrî verdî ra. Apê ey Reşat Kaymazî vat ke ma waştbî ê peyênî bê û ma wazenê ke şarê ma bireso azadîya xo.
Ugur Kaymaz 21ê teşrîna peyêne ya 2004î de, yanî 22 serrî ver, 12 serre de, bi 13 gule û pîyê xo Ahmet Kaymazî reyde, verê keye xo de, hêzanê çekdaranê dewlete ra ame kiştene. Apê ey Reşat Kaymazî, derheqê kiştişê birazayê xo Ugur û birayê xo Ahmetî de, ajansa ma rê qisey kerd.
‘Şewa ke Ugur û pîyê ey ameyî kiştene, Qoser de bêvengîye nuşte ro’
Şewa 21ê teşrîna peyêne ya 2004î de, qezaya Qoserê Mardînî de vengê çekan berz bî. Bi 13 guleyan Uguro 12 serre û bi desan guleyan pîyê ey Ahmet Kaymaz pîya ameyî kiştene. Resmê pêlavê lastîkî yê Ugurî ke erdî ser o mendibî, şarî vîre de sembolê bêgunehî û domanîye mend. Dadgehê Mafanê Mirovan ê Ewropayî (DMME) Tirkîya ceza kerde, labelê dewaya Ugurî û pîyê ey tepîya nêamê akerdene û kiştoxî bêceza mendî.
‘Ugur û pîyê ey sey di hevalan bî’

Reşat Kaymazî vat ke Ahmet şoforê kamyonî bî û ciwîyayîşê xo bêtir rayîrê dûran de vîyarnayêne. Ey vat ke têkilîya Ugur û bawkê ey sey têkilîya di hevalan bî; wexto ke Ahmet keye de nêbî, Ugurî sey kesêko gird tever geyrayêne û berpirsîyarîya keye girewtêne serê xo. Reşatî vat ke Ugur domanêko bêguneh bî û domanîya xo de sey şoreşgerêk tever geyrayêne, û her kesî ey rê hes kerdêne.
‘Ugurî pers kerdêne, çima dewa ma ame veşnayene?’
Reşatî vat ke ê malbatêko welatparêz ê û coka dewa înan ame veşnayene. Ey vat ke Ugurî her game derheqê vurnayîşanê dorûverî de pers kerdêne û coka hêrseko gird ey de est bî. Reşatî vat ke Ugurî reyê ey ra çetelastîk waşt ke vera polîsan kar bîyaro, çike polîsan çalakîyan de hêrişê girseyî kerdêne.
‘Ma nameyê Ugur û Ahmetî na domananê xo ra’
Reşat Kaymazî vat ke wexto ke Ahmet û Ugur ganê xo ra bîyî, êy namê înan na domananê xo ra. Ey vat ke hezaran malbatê kurdan namê Ugurî na domananê xo ra, û Rojava de goristanê Xebat Dêrikî de yew cinîya şoreşgere namê xo kerd Ugur Kaymaz.
Reşatî qiseykerdişê xo de Prosesê Aştîye û Komelê Demokratîkî ra zî behs kerd û vat ke ê wazenê ke waştenê şehîdan bêrê caardene: “Ma Kurdîstanêko azad, Rayberêko azad û Tirkîya de sîstemêko demokratîk wazenê.”






