Dêrsim – Serekê Şubeya Egîtîm Senî ya Dêrsimî Mehmet Aşkinî reaksîyonê xo berdişê bînayanê walîtî û edlîye yê zerreyê kampusê Unîversîteya Munzurî rê mojna. Mehmet Aşkinî vat ke na rewşe cuya rojane ya wendekaran û kedkaranê perwerde û zanistî ser o tesîrêko xirab kerdo.
12ê êlula 2025î de bi eşkerayîyêke ame îlankerdiş ke bînayê Walîtîya Dêrsimî û Edlîye do kampusê unîversîte rê bêrê barkerdiş û dima zî ameyî barkerdiş. Seba nê di dezgehanê ke şîyî zerreyê kampusî, nêmeyê kitabxaneya unîversîte edlîye rê ame cîyakerdiş; walîtî û mudirîyanê aye rê zî di bînayê cîyayî ameyî cîyakerdiş. No problem hetê perwerde û psîkolojî ra wendekaran ser o zaf tesîr kerd. Çunke her kes eşkeno bi rehetî bikewo mîyanê unîversîte û tu sînorkerdiş çin o, kesê sucdarî yê ke yenê edlîye eşkenê wendekaran rê zerar bidê.
2 wendekaran rê 20 aşmî cezaya hepsî ame dayîş
Badê nê qerarî wendekaranê Unîversîteya Munzurî no qerar protesto kerdbi. Seba nê protestoyî vera zaf wendekaran cigêrayîş ame akerdiş. Wendekarê ke vera înan cigêrayîş ameybi akerdiş, înan ra 2 kesan rê 20 aşmî cezaya hepsî ame dayîş û no qerar şawîya îstînafî. La hetê îstînafî ra derheqê na dosya de hema qerarêk nêameyo dayîş.
Rektorî vatbi ke na rewşe tena serrêk do dewam bikero la hema dewam kena
Badê ke wendekaran protesto kerd, rektorî wendekaran û raya pêroyîye rê eşkerayîyêke dabî û vatbi ke na rewşe tena serrêk do dewam bikero. La rixmê ke ser ra serrêk vîyarto zî, walîtî û edlîye hema zî kampusê unîversîte de yê û derheqê nê çîyî de ke nê dezgehî do key kampus ra vejîyê, qet agahî çin a.
Wendekaranê ke roja verêne ra nat nêrazîbîyayîşê xo anê ziwan, reyna Ajansa Welatî rê dîyar kerd ke ê na rewşe qebul nêkenê û seba ke perwerdeyê înan bi hawayêko baş dewam bikero, waşt ke her di dezgehî tavilî kampus ra bêrê vetiş. Wendekaran da zanayîş ke rektor perwerdeyê wendekaran nêgêno ver çiman û ard ziwan ke heqo tewr tebîî yê înan protesto yo la rektor vera nê heqî hukmî sey hacetêk vera înan xebitneno.
Serekê Şubeya Egîtîm Sen’î ya Dêrsimî Mehmet Aşkinî derheqê na babete de qisey kerd.
‘Raya verêne ya ke zerreyê kampusêk de bînayê edlîye û walîtî ca gênê!’
Mehmet Aşkinî bale ante barkerdişê bînayanê walîtî û edlîye yê kampusê Unîversîteya Munzurî ser û vat: “Na rewşe tu welatî de hende nêameya dîyayîş; bi temamî rewşêka xerîbe ya û nêyena famkerdiş. Çunke raya verêne ya ke zerreyê kampusêk de bînayê edlîye û walîtî ca gênê. Na rewşe cuya rojane ya wendekaran ser o tesîrêko xirab kerd; hetêko pozîtîf qet çin o. Wendekarî cuya xo ya rojane de raştê bînayanê walîtî û edlîye û qelebalixîya înan ameyî. Eynî wext de kedkaranê perwerde û zanistî zî na rewşe ra tesîr dîyo. Çunke her di dezgehan kampus de trafîkêko giran ê merdiman û wesayîtan, giranîyêk û tedbîrê emnîyetî ardî. Coka kedkaranê perwerde û zanistî zî cuya xo ya kampusî de bi hawayêko negatîf tesîr dîyo.”
Rektorî eşkerayîyêka neraşte kerde
Mehmet Aşkinî vat ke rektorîye eşkerayîyêke dabî û vatbi ke do cayanê cîya-cîyayan ra kewtiş bêro dayîş û wina dewam kerd: “La no vateyêko neraşt bî; çunke kampus de tu ca çin o ke cayêkê cîya ra kewtiş bêro kerdiş û çîyêko winayên qet mumkin nîyo. Rektorî bi xo zî no çî zanayêne la reyna zî raya pêroyîye xapêna û îdia kerd ke do cayêkê cîya ra kewtiş bêro kerdiş û wendekarî, kedkarê perwerde û zanistî, yanî kesê ke kampus de yê, do na rewşe ra tesîr nêvînê. La no çî qetîyen raşt nêbî; çunke ê cayan û nê bînayan rê tena yew kewtiş est o û astengkerdişê ey qet nêbeno. Na rewşe zî her kes zano.”
‘Kitabxaneya unîversîte bi xo bes nêkena la a zî bînaya edlîye reyde yena parekerdiş’
Mehmet Aşkinî bale ante sloganê bingeyênî yê Unîversîteya Munzurî “Zanist de aver, fikir de azad” ser û wina dewam kerd: “La no îfade caardişanê ke yenê kerdiş reyde eşkera pêra dij o. Unîversîteya ke îdia kena zanist de aver a, kitabxaneya aye bi xo bes nêkena û na kitabxane zî bînaya edlîye reyde yena parekerdiş; seba ke edlîye rê ca bibo, a yena tengkerdiş. Eke rektorî bi raştî dezgehê xo, yanî unîversîte û kampus ra hes bikerdêne û qîymet bidayêne zanist, cigêrayîş û perwerdeyî, nêverdêne ke nê dezgehî hende bi rehetî bêrê uca. Ca bi xo hema unîversîte rê bes nêkeno; parekerdişê cayêkê winayênî dezgehanê bînan reyde zî ewnîyayîşo neraşt ê rektorî yê perwerdeyî ser mojneno.”
‘Ma her tewir mesele û hewcedarîyanê wendekaran û kedkaranê perwerde û zanistî taqîb kenê’
Mehmet Aşkinî vat ke Egîtîm Seê Dêrsimî nê problemî ser o vindeno û wina dewam kerd: “Ma her tewir mesele û hewcedarîyanê wendekaran û kedkaranê perwerde û zanistî taqîb kenê. Roja ke qerarê barkerdişî ame girewtiş ra nat ma îtîrazê xo yê heqdarî ardî ziwan. Ma wazenê ke kedkarê perwerde û zanistî û wendekarî kampus de bi hawayêko tewr azad biciwîyê û seba nê çîyî zî ma do têkoşînê xo dewam bikerê. Eşkera yo ke dezgehê dewlete goreyê waştişê sendîkayêke qerarê xo nêvurnenê; ma çîyêko winayên zaf nêpawenê. La na rewşe nêbena asteng ke ma têkoşîn bikerê û derheqê na babete de raya pêroyîye agahdar bikerê. Heyf ke sîstem demokratîk nîyo, coka fikrê parçeyanê unîversîte, kedkaranê perwerde û zanistî, wendekaran û sendîkayan nêyenê girewtiş. Çunke qerarî cor ra yenê girewtiş û eşkera yo ke cor ra zî yenê caardiş.”













