Demêk de ke şarê Şingalî pawenê ke heqê înan ê îdarî, komelkî û sîyasî bêrê naskerdene, Partîya Ciwananê Êzîdî ya ke serra 2026î de ameye awankerdene, bi îdîaya ke emnîyetê Komara Iraqî tehdîd kena, ameye padayene.
Şingal de çarçewaya entegrasyonê demokratîkî de hukmatê Iraqî reyde prosesêko muhîm dewam keno. Nê prosesî de waştişanê komelê êzîdîyan ra yew zî no yo ke îradeyê ci yo sîyasî, komelkî û îdarî bêro qebulkerdene. Demêk de ke komelê êzîdîyan paweno ke îradeyê xo yo sîyasî bêro naskerdene, Heyetê Dadgerî yê Weçînayîşan ê Iraqî qerarê padayîşê Partîya Ciwananê Êzîdî da.
13ê teşrîna verêne 2026î de qerarê padayîşî ra pey Serekê Partîya Ciwananê Êzîdî vera qerarê Heyetê Dadgerî yê Weçînayîşan dadgehe rê muracat kerdbî. Ey dîyar kerdbî ke no qerar nêyeno qebulkerdene, vera qanûnê esasî yo, bi taybetî vera Madeya 39. ya ke azadîya awankerdişê partîyanê sîyasîyan garantî kena û raporanê emnîyetî yê nezelalan ser o ameyo ronayene; seba naye waştbî ke qerar betal bibo.
Dadgeha Federale îtîraz wextê xo de dî û hetê şeklî ra qebul kerd. La hetê tedeyî ra dadgehe dî ke Daîreya Partîyan a Komîsyonê Weçînayîşan bi raporanê emnîyetî yê ke hêzanê emnîyetî pêşkêş kerdbî, resaya na bawerîye ke çalakîyê na partî “emnîyet, yewîya erdê ci û serdestîya Komara Iraqî tehdîd kenê.” Bi na behane qerarê Heyetê Dadgerî yê Weçînayîşan ê bi hûmara 20 û bi tarîxê 13ê teşrîna verêne 2026î ame tesdîqkerdene. Bi nê qerarî peynîya çalakîyanê partî ame; qerar ame dayene ke heme merkezê aye bêrê padayene û mal û milkê aye ser o destserronayîş bibo.
Ganî bêro vatene ke Partîya Ciwananê Êzîdî 9ê nîsana 2026î de kongreyê xo yê awankerdişî merkezê Şingalî de, binê çimdarîya Heyetê Daîreya Partîyanê Sîyasî yê Komîsyonê Weçînayîşan de û bê ke heyetî îtîraz bikero, viraştbî.











