Hemverfekê YBŞ’yî Hadî Elyasî vat ke înan tu rey xo dewleta Iraqî ra cîya nêdîyo û ê babeta entegrasyonî bi cidîyet nêzdî benê: “Îstîqraro raştikên tena bi heqanê êzîdîyan, edalet û newe ra awankerdişê Şingalî mumkun o.”
Hemverfekê Yewînanê Xoverdayîşê Şingalî Hadî Elyasî bernameyê Çira TVyî de derheqê entegrasyonê dezgehanê emnîyet û îdareyî yê Şingalî yê sîstemê dewleta Iraqî de qisey kerd. Elyasî vat ke pêdîyayîşê înan ê berpirsîyaranê leşkerî yê Iraqî sibate de dest pêkerdî û amanc o yo ke seba entegrasyonê hêz, dezgeh û komelê înan peymanêka biemnîyet bêro kerdene.
Elyasî ard ziwan ke problemê Şingalî tena bi emnîyetî sînordar nîyê; peyserageyrayîşê şarî, tazmînat, newe ra awankerdişê cayanê niştişî û dîyayîşê vindîbîyayeyan zî ganî bêrê çareserkerdene: “Ma entegrasyonêko raştikên wazenê ke taybetmendîyê komel û hêzanê ma bêrê pawitene û vernîya felaketêk sey 2014î bêro girewtene. Ma wazenê Asayîşê Êzîdxanî, YBŞ û YJŞ bibê parçeyê sîstemê dewlete.”
Elyasî vat ke îdîayê ke YBŞ vera dewleta Iraqî ya, xelet ê: “Hêzanê ma demanê ke beyraqa Iraqî Enbar, Tîkrît û Mûsilî de nêameyêne berzkerdene, Şingalî de berz kerde. Mesajê ma hukmatê Iraqî rê no yo ke ma derheqê entegrasyonêkê fermî û sîstematîkî de cidî yê; mesajê ma şarê ma rê zî no yo ke na game do ameyox, emnîyet û heqanê komelê ma bigîro garantî.”
