DÎSK Basin-Îş û TGS’yî vera tayînkerdişê qeyûmî yê Sozcu TV’yî nerazîbîyayîşê xo mojna û dîyar kerd ke no qerar azadîya çapemenîye û heqê şarî yê girewtişê xeberan rê derbêko giran o.
Polîsan serê sibayî awanîya Sozcu TV’yî ya Îstanbul ser o sereştiş kerd. Sewbîna polîsan keyeyanê îdarekaranê TV’yî ser o zî sereştiş kerd. Çend îdarekarê TV’yî ameyî destbendkerdene û polîsan awanîya televîzyonî de gêrayîş kerd. Fonê Sîgortaya Mewduatê Tesarrufî (TMSF) da zanayene ke televîzyonî ser o qeyûm ame tayînkerdene. DÎSK Basin-Îş û Sendîkaya Rojnamegeranê Tirkîya (TGS) hesabanê xo yê medyaya dîjîtale ser o vera tayînkerdişê qeyûmî yê Sozcu TV’yî cewab da.
‘Qeyûm derbêko giran o û qet nêyeno qebulkerdene’
Basin-Îş’î hesabê xo yê X’î ser o derheqê qeyûmê Sozcu TV’yî de cewab da û wina vat: “Qeyûmo ke ewro Sozcu TV’yî ser o ame tayînkerdene, azadîya çapemenîye û heqê şarî yê girewtişê xeberan rê derbêko giran o û qet nêyeno qebulkerdene. No qerar tena sebebê bêvengkerdişê vengêkê ekranî nîyo, eynî wext de bi seyan kedkaranê çapemenîye ser o tesîr keno. Hetê teknîkî ra zî rojnamegeran ver bi rewşêka nezelale beno û înan ser o tesîrêko nebaş keno. Nê demo zehmet de ma kedkaranê Sozcu TV’yî reyde yê. Ma venga heme raya pêroyî danê ke wayîrê heqê agahîgirewtişî û çapemenîye bivejîyo.”
‘Ganî îqtîdar pratîkanê xo ra fek veradero’
Sendîkaya Rojnamegeranê Tirkîya zî dîyar kerd ke pêlê Qeyûman ê ke bi Tele1 dest pêkerd û bi Halk TV’yî dewam kerd, nika Sozcu TV zî ame destserronayene û parekerdişê xo de nê çîyî ardî ziwan: “No hêriş o û heqê şarî yê agahîgirewtişî ser o yo. Heqê girewtişê xeberan keno hedef. Qeyûmê ke kanalan ser o yenê tayînkerdene, vernîya agahîgirewtişê şarî gênê. Ma venga desthilatî danê ke cade pratîkanê xo ra fek veradero û azadîya çapemenîye û heqê şarî yê girewtişê agahîyan rê hurmet bikero.”











