Endamê Akademîya Zanistê Komelkî ya Abdullah Ocalanî Duran Kalkanî bale ante ser o ke seba serkewtişê Prosesê Haştî û Komelê Demokratîkî rîbirîbîyayîşê vîyarteyî muhîm o û vat ke seba çareserî ganî dewlete êdî gamanê cesûran bierza.
Duran Kalkanî Medya Haber TV rê qisey kerd. Kalkanî verê şehîdê Rojhelatî yad kerdî û vat ke ciwananê Rojhelatî her çar parçeyanê Kurdîstanî de têkoşînê azadîye rê qîymetê girdî dayî. Ey derheqê serrgêra 48. ya ronayîşê PKKyî de zî qisey kerd, PKK sey têgêrayîşê Rayberî û şehîdan tarîf kerd û vat ke raştîya Rayberî qîymeto tewr gird o ke PKKyî viraşto.
‘No kar eşkeno Dêrsimî ra dest pêbikero’
Kalkanî bale ante Tertelê Dêrsimî ser o û wina vat: “Dewlete eşkena bi rîbirîbîyayîşê Dêrsimî raştîya kurdan qebul bikera û seba çareserîya meseleya kurdan game bierza.” Ey dîyar kerd ke hema cayê goranê Seyîd Rizayî û embazanê ey zî bellî nîyê, heqê şarê Dêrsimî est o ke goranê qehremananê xo bivîno û venga îdareyê AKPyî da: “No kar eşkeno Dêrsimî ra dest pêbikero.”
‘Cayê Rayber Apoyî bedilîyayo, statuyê ey nêbedilîyayo’
Kalkanî vat ke proseso ke bi vengdayîşê 27ê sibate 2025î dest pêkerd resayo merheleyêka muhîme la cayê Rayber Apoyî bedilîyayo, statuyê ey nêbedilîyayo. Ey wina vat: “Bedilîyayîşê statuyî çin o. Goreyê naye şertanê xebate de zî bedilîyayîşêko cidî çin o.” Kalkanî wina dewam kerd: “Nê prosesî tena Rayber Apo eşkeno biresno serkewtişî. Eke Rayber Apo bi azadî bixebitîyo, biciwîyo û îdare bikero proses reseno serkewtişî.”
‘Tirkîyaya demokratîke ra tewr zaf tirkî do feyde bivînê’
Kalkanî reaksîyon mojna ke berpirsîyarî tena PKKyî ser o yena barkerdene û vat ke têgêrayîşî gamê xo eştî. Ey wina vat: “Eke hêrişêko leşkerî yo plankerde nêbo sebebê pêkewtişê çekdarî yê Tirkîya reyde hewa nîyayê. Naye ra dima ganî îqtîdar û dewlete gaman bierzê.” Kalkanî vat: “Nika dore ya vetişê qanûnanê azadîye û eştişê gamanê ke Tirkîya demokratîk kenê ya. Tirkîyaya demokratîke ra tewr zaf tirkî do feyde bivînê.”
‘Heta ke zîndanan ra cenazeyî bivejîyê kes hesab nêkero ke haştî bena’
Kalkanî hepsî Tuncer Saglam sey “şehîdê Haştî û Demokrasî” yad kerd û vat ke bi seyan hepsîyê ke 30 serrî temam kerdê nêyenê verdayene û êyê ke înan nêverdanê vera prosesî yê. Ey wina vat: “Heta ke zîndanî wina bê û zîndanan ra cenazeyî bivejîyê kes hesab nêkero ke haştî bena, demokrasî yeno.” Kalkanî çalakîyê piştîpêdayîşî yê hepsîyan û bitaybetî têkoşînê dayîkan silam kerdî.
‘Qeza nîya qirkerdiş o, cînayet o’
Kalkanî derheqê COP31î de vat ke êyê ke nê zîrweyî organîze kenê berpirsîyarê xerabbîyayîşê îklîmî yê û xebatê Zîrweyê Îklîmî yê Şaran muhîm ê la ganî alternatîfî bêrê viraştene. Ey derheqê merdişê 19 karkeranê HABAŞî de vat: “Qeza nîya. Qirkerdiş o, cînayet o.” Kalkanî peynî de bale ante ser o ke qewetê çepgir û demokratîkî tay xebitîyenê û vat ke eke fehm, rêxistin û têkoşîno raşt bibo sîstemê modernîteya kapîtalîste her ca de yeno teşhîrkerdene.










