Wendekaranê Unîversîteya Rojava rayîrê heyetêkê Hukmatê Demkî yê Şamî girewt, nêverda ke unîversîte ra vejîyo û waşt ke hukmat qerarê xo yê derheqê Unîversîteya Rojava de ra fek verado û statuyê ziwanê kurdkî nas bikero.
Ewro heyetêkî Hukmatê Demkî yê Şamî îdareyê Unîversîteya Rojava reyde kombîyayîşêk kerd û derheqê entegrekerdişê unîversîte bi unîversîteyanê Sûrîye de munaqeşe kerd. Kombîyayîşî ra pey wendekaran nerazîbîyayîşê xo mojna û rayîrê heyetî girewt, nêverda ke endamê heyetî vejîyê û waştişê xo ardî ziwan.
Badê ke kombîyayîş qedîya wendekaran dorê heyetî girewt û qebul nêkerd ke hetanî waştişê înan nêrê eşnawitene heyet unîversîte ra vejîyo.
Hêrs û protestoyê wendekaran vera nê waştişî yo ke Unîversîteya Rojava bikewo mîyanê Unîversîteya Firatî. Sewbîna wendekarî wazenê ke statuyê ziwanê kurdkî bêro naskerdene û kurdkî bibo ziwanêko fermî.
‘Ma do her tim wayîrê unîversîteya xo bivejîyê’
Munaqeşeya unîversîte ra pey wendekaran hewşa unîversîte de eşkerayîyêk da. Bi nameyê Unîversîteya Rojava eşkerayî hetê Nesrîn Mihemede ra ameye wendene.
Nesrîn Mihemede dîyar kerd ke Unîversîteya Rojava tena nameyê sazgehêk nîya, netîceyê têkoşîn, kede û xebatanê zaf serran a û wina vat: “Sewbîna estbîyayîş û dewamkerdişê aye bi nasnameyê neteweyî û taybetîya aye ra girêdaye yê. Ma do vera her qerarêko ke taybetîya unîversîteya ma kena hedef, tepşê xo dewam bikerê û seba pawitişê nasname, ziwan û estbîyayîşê Unîversîteya Rojava têkoşînê xo dewam bikerê.”
Nesrîn Mihemede da zanayene ke pawitişê Unîversîteya Rojava pawitişê heqê wendişî bi ziwanê dayîke û heqê şarê kurdan o ke warê zanistî û perwerdeyî de nasnameyê xo bipawo.











