Dêrsim – Serrgêra 89. ya dardekerdişê Seyîd Riza û embazanê ey de, tornanê ey bale ante ser ke birîna Dêrsimî hema zî teze ya. Înan da zanayene ke aştî bê têrîameyîşî nêbena û waşt ke dewlete bi lez cayê mezelan eşkera bikero û efû biwazo.
Serrgêra 89. ya Terteleyê Dêrsimî û dardekerdişê Seyîd Riza û embazanê ey de, tornanê Seyîd Riza derheqê dej, zulm û bêedaletîya ke ameya kerdene de qisey kerd. Tornan bale ante ser ke birîna Dêrsimî hema zî zerreyê înan de nêqedîyaya û waşt ke dewlete cayê mezelan eşkera bikero û bi resmî efî biwazo.
Tornanê Seyîd Riza ra Sakîne Polate, Emîne Karaca û Seyîd Alî Polatî hîs û waştişê xo ajansê ma rê vatî.
‘Na birîna ma zaf kûr a, hema zî cigera ma vêşena’
Sakîne Polate da zanayene ke dewlete kokê keyeyê înan ard û zulmêko pîl ard serê şarê Dêrsimî: “Merdimê ma pêro qir kerdî. Ma ne kalikê xo dî, ne pîrika xo dîye, ne zî xalê xo dî. Kalikê ma merdimêko hewl bî. Hetanî ewro zî no bar û no derdo giran ke serê ma de yo, nêqedîyeno. Na birîna ma zaf kûr bîya, hema zî cigera ma vêşena. Ma wazenê ke mezelê înan bivînê, şêrê serê mezelanê xo, qurbananê xo bibirnê û xêrê înan vila bikerê.”
‘Hetanî ke mezelî eşkera nêbê, aştî senî bena?’
Emîne Karaca zî dîyar kerd ke kalikê aye seba ke neheqîye qebul nêkerdêne, ame dardekerdene: “Kalikê mi esasê xo de xayinê welatî nîyo; ey qet neheqîye qebul nêkerdêne, coka ame dardekerdene. Ma rê zulmêko giran ame kerdene; domanê ma pêro kiştî, pî û lajî pîya berdî û verê çimanê pî de darde kerdî. Hetanî ke nê mezelî eşkera nêbê, ma do kotî de çila xo roşn bikerê? Aştî rind a, ma zî aştî wazenê; wa domanê ma telef nêbê. La ganî dewlete Meclîs de nê şarê elewî ra efî biwazo, efwaştişê xo biyaro ziwan û heqê elewîyan bido înan.”
‘Mayanê ma yê domaninan girewtî û domanê ma kiştî’
Seyîd Alî Polatî zî bale ante ser ke hedefê dewlete tena Seyîd Riza nêbî, şarê pêroyî bî: “Wextê Terteleyê Dêrsimî de maya mi binê merdeyan de xo nimnena û bi no hawa xelesîyena. Ez tornê ey a ke verê înan de sere nênaro. Bêsebeb merdimê ma kiştî, bi rojan Munzur ra gonî şîye. Cayê mezelan vajê! Mayê ma yê domaninî girewtî û domanê ma kiştî. Madem ke hedefê şima Seyîd Riza bî, ey ra dima şima çira hende merdimî kiştî? Hedefê înan şarê pêroyî bî. Hetanî ke ma biciwîyê, no do sey birîna ma bimano û tornê Seyîd Riza do hesabê nê çîyî bipersê.”











