Misir de bi qerarê dadgehe 35 dezgehî ameyî kerdene lîsteya “rêxistinanê terorî” ke “Musulmans de France” (Muslumanê Fransa) û Konseya Muslumananê Ewropa zî mîyanê înan de yê.
Qerarêkê dadgeha cezayî ya paytextê Misirî Qahîre 10ê teşrîna peyêne de Rojnameyê Fermî de ame weşanayene. Bi nê qerarî 35 dezgehan reyde 36 kesî zî ameyî kerdene lîsteya terorî ya Misirî.
Lîste de Musulmans de France ke nameyê ci yo kehen Yewîya Dezgehanê Îslamî ya Fransa (UOIF) bî, Yewîya Muslumanan a Îngilîstanî, Yewîya Muslumanan a Swîsre û Komelê Îslamî yê Almanya zî est ê. Sewbîna Konseya Cigêrayîş û Fetwa ya Ewropa, Konseya Îmamanê Ewropa û Enstîtuyê Zanistanê Beşerî yê Ewropa zî nê dezgehan ra yê ke qerar înan ser o tesîr keno.
Sebebê qerarî de ke dezgehanê Fransa, Îngilîstan, Almanya, Swîsre, Swêd û Îtalya gêno xo mîyan, îdîaya têkilîya înan a Birayanê Muslumanan reyde est a.
Îdareyê Misirî 2013î de badê ke Serekkomar Muhammed Mursî îqtîdar ra ame durîvîştene Birayê Muslumanî sey rêxistina terorî îlan kerdbî.









