Şaristanê Îlamî yê Rojhelatê Kurdîstanî de sebebê varanan ra 8 qezayan de binawanî zaf zerar dî û rayîran de trafîk vinderd.
Îlam, hetê feqîrîye û krîza ekonomîk ra herêmanê Îranî yê tewr xiraban ra yew o. Goreyê xeberanê ajansanê ke Îran de weşan kenê, nê şaristanê Rojhelatê Kurdîstanî de sebebê varanê zafî yê payîzî ra cuye felç bîya.
Qezayanê Îlam, Dêhluran, Avdanan, Dereşehîr, Mêhran, Sîrwan, Çardawil, Hêlîlan û Murmurî de laseran keye û cayê karî yê welatîyan binê awe de verdayî, herêmanê koyinan de hezaz bîye û rayîrê serekeyî ameyî girewtene.
Çimeyê debarê şarê herêm o serekeyî weyekerdişê heywanan o. Welatîyê ke konan de ciwîyenê û debarê xo bi wina kenê, laser ra tewr zaf zerar dî.
Ame dîyarkerdene ke sebebê birûskan û awa laseran ra bi desan pez û heywanê girdî merdî û 350 kîlometre rayîrê zozanan zerar dîyo.
Berpirsîyaran waşt ke seba nê halî welatî zozanan ra rewî agêrê. No qerar rasterast cuya 60 hezar welatîyanê ke konan de ciwîyenê ser o tesîr keno.










