Hemserekê Pêroyî yê DEM Partî Tuncer Bakirhanî dîyar kerd ke ê seba rewşa sîyasî ya Herêma Kurdîstanî xemgîn ê. Ey wina va: “Ma tîya venga mesulanê Herêma Kurdîstanî danê ke nê munaqeşeyan ra vejîyê. Ma sey kurdanê ke tîya yê, rewşêka winasîye qebul nêkenê. Ganî qezencê herême bêrê pawitiş. Ma yewîya demokratîke ya kurdan pawenê. Ma sey DEM Partî venga îdarekar û hetan danê ke peymanêko newe îmze bikerê. Kurdî pêameyîş û çareserkerdişê problemî pawenê.”
Meclîsê Partî yê DEM Partî Merkezê Pêroyî yê partî de kom bî. Rojeva kombîyayîşî de averşîyayîşê derheqê prosesî de est ê. Hemserekê Pêroyî yê DEM Partî Tuncer Bakirhanî qiseykerdişê akerdişî yê kombîyayîşî kerd.
Tuncer Bakirhanî destpêkê qiseykerdişê xo de keyeyê girewteyê nêweşî Tuncer Saglamî rê serweşî waşt ke ewro Ankara de cuya xo vîndî kerd. Ey wina va: “Herçiqas nêweşîyê ey ê giranî bîyî zî înfazê ey ame taloqkerdiş û seba ke tedawîyêka rêkûpêke nêame kerdiş, cuya xo vîndî kerde. Ma tîya venga mesulanê dewlete danê ke nê caardişî ra fek veradê û girewteyê nêweşî bêrê veradayîş. Ma Tuncer Saglamî vîr anê û soz danê ke ma do mucadeleyê înan ser bixînê û xeyalanê înan bica biyarê.” Tuncer Bakirhanî endama meclîsê partîya xo Nesrîn Aslane zî vîr arde ke çend rojî verê cû cuya xo vîndî kerdbî.
‘Krîzê ekonomî û fonî’
Tuncer Bakirhanî dîyar kerd ke ê demêko muhîm de kombîyayîşê xo kenê û wina va: “Dinya de her ca de merdimî seba heqanê xo kuçeyan de yê û xo ver danê. Ma zî seba butçeya nanî, aştîye û edaletî kuçeyan de yê. Kampanyaya ma dewam kena. Gendelîya fonî eşkera bîye. La tu kes kontrol nêkeno û tu kesî mesulîyet nêgirewt xo ser. Tu kesî hesab zî pers nêkerd. Ganî ê ke na gendelî kerda û bêveng mendê, hesab bidê. Ganî meaşo tewr kêm sînorê vêşanîye ra berz bo û serre de 2 rey zêde bibo. Hem zî ganî meaşê teqawitan zêde bibo û teqawitî şertanê rindan de bieşkê bicuyê. Hem zî problemê keyeyan ê welatijan esto. Ganî dewlete keyeyê komelkî awan bikera û problemê welatijan çareser bikera.”
‘Ganî ma pêro mesulîyet bigîrê xo ser’
Tuncer Bakirhanî qetî kerd ke Prosesê Aştîye û Komelê Demokratîkî eşkeno heme problemanê rê çareserî biyaro. Ey qiseykerdişê xo wina dewam kerd: “Eke proses bi serkewtişî biqedîyo, problemê keyeyan ra heta ekonomî problemê welatijan eşkenê bêrê çareserkerdiş. Coka no proses zaf muhîm o. Eke no proses bi serkewtişî biqedîyo, partîyê sîyasî zî eşkenê bi rehetî sîyaset bikerê. Eke proses bi serkewtişî biqedîyo, girewteyê sîyasî zî do bêrê veradayîş. Coka ganî no proses sey prosesê kurdan û dewlete nêbêro dîyayîş. No proses yê ma pêrune yo. Eke ma wina bifikirîyê û îqtîdarî ser o zext bikerê, îqtîdar do mecbur bimano ke gaman bierzo. Ganî ma pêro nê prosesî de mesulîyetêko pîyayî bigîrê xo ser.”
‘Ganî dînamîkê komelkî zî seba serkewtişê prosesî bixebitîyê’
Tuncer Bakirhanî da zanayîş ke proses de vindertiş çin o û wina va: “La seba ke gamê lazimî nêameyê eştiş, fikaran xo reyde ano. Ganî îqtîdar êdî gamanê bawerinan bierzo. Ganî firsendê nê prosesî rind bêro xebitnayîş û taloq nêbo. Ganî dînamîkê komelkî zî seba serkewtişê prosesî mesulîyet bigîrê xo ser.”
Tuncer Bakirhanî ard ziwan ke mucadeleyê înan ê Komara Demokratîke dewam keno û wina va: “Wezîfeyêka pîle ya endamanê Meclîsê Partîya ma na ya ke amancê ma yo Komara Demokratîke heme welatijan rê biresnê. Ganî ma şêrê beşanê cîyayan ê komelî. Ma partîyêka wayîrê erj û bedelan ê. Ma seba ke mucadele û xeyalanê erjanê xo bica biyarê, mucadele kenê. Ganî ma seba pîlkerdişê partîya xo hîna zaf mesulîyet bigîrê xo ser û bixebitîyê.”
‘Ma seba rewşa Başûrî xemgîn ê’
Tuncer Bakirhanî bale ante problemê mabênê YNK û PDK’yî ser ke Herêma Kurdîstanî de yo û wina va: “Çend rojî verê cû ma Başûrê Kurdîstanî de tewrê forumêk bîyî û uca derheqê yewîye de dîmenê weşî vejîyayî werte. La çend rojî verê cû uca parlamento badê 2 serran kom bî û YNK û Nesilê Newe tewrê roniştişê parlamentoyî nêbîyî. Nika zî tehlukeyê îdareyêkê dihetinî esto. Ma seba naye zaf xemgîn ê. Ma tîya venga mesulanê Herêma Kurdîstanî danê ke nê munaqeşeyan ra vejîyê. Ma sey kurdanê ke tîya yê, rewşêka winasîye qebul nêkenê. Ganî qezencê herême bêrê pawitiş. Ma yewîya demokratîke ya kurdan pawenê. Şarê kurdî seba cîyabîyayîşî bedelê zaf pîlî dayî. Ganî no hal tekrar nêbo. Ma sey DEM Partî venga îdarekar û hetan danê ke peymanêko newe îmze bikerê. Eke seba naye mesulîyetêk bikewo mil ê ma zî, ma hedre yê. Kurdî pêameyîş û çareserkerdişê problemî pawenê.”
