Îstanbul – Halê weşîya hepsîya nêweşe Evîn Zapsû ya ke 10 serrî yo hepisxane de ya, seba ereynayîşê tedawî xeternak beno. Mêrdê Evîn Zapsû Mecît Zapsûyî waşt ke Evîn Zapsû bêra verdayene û wina vat: “3 rojan ra ver ez şîya hepisxane. Halê aye qet weş nêbî. Hewcedarîyanê xo yê rojaneyî tena nêeşkîyena bîyaro ca. Evîn goni vereşena.”
Goreyê doneyanê Komeleya Heqanê Merdiman a Amedî (ÎHD), Tirkîya de hezar û 412î ra zêde hepsîyê nêweşî est ê. Nê hepsîyan ra 335 kesî halêkê weşîye yo giran de yê. Mîyanê înan de hepsîyê ke bi nêweşîyanê kronîk û giranan ciwîyenê zî est ê. Seba şert û mercanê hepisxane û ereyvistîşê tedawî, halê înan roje bi roje xirabêr beno.
Hepsîyanê nêweşan ra yewe zî Evîn Zapsû ya. Evîn Zapsû serra 2016î de Mêrsîn de bi sûcê “endamîya rêxistine” ameye destbendkerdene. Îstanbul de hukmkerdişî ra pey ceza ameye birnayene û ameye şawitene Hepisxaneyê Bakirkoyî. Serra 2021î de zî ameye şawitene Hepisxaneyê Kayserî û panc serrî yo uca de vindarnîyena. Evîn Zapsû verê hepsbîyayîşî nêweşe nêbîye la nêzdîyê çar-panc aşman ra ver problemê weşîye peyda bîyî. Waştişanê aye û embazanê aye yê hepisxane reyde zî, şawitişê aye yê nêweşxane demêko derg ame astengkerdene.
Mêrdê Evîn Zapsû Mecît Zapsûyî derheqê nêweşîya cinîya xo û halê aye yê peyênî de Ajansa Welat rê qisey kerd.
‘Îdarekaranê hepisxaneyî problemî vetî’
Mecît Zapsûyî dîyar kerd ke Evîn verê hepisxane nêweşe nêbîye la şert û mercanê hepisxane ra nêweşîyî peyda bîyî û wina vat: “Dejê Evîne 4-5 aşman ra ver dest pêkerdbî. Waştêne ke şêra nêweşxane la îdareyî sewqê aye nêkerdêne. Îdarekaranê hepisxaneyî problemî vetî. Embazê ma yê hepsî zaf mewzûyê Evîne ser o vinderdî. Înan îdareyê hepisxane rê waştişnameyî şawitî. La her rey maneyî ameyî mojnayene. Çiqas wext vîyart, nêweşîya Evîne hende giranêr bîye. Di aşman ra ver Evîne ameye berdene nêweşxane. O wext doktoran vat: ‘Pîzeyê aye û gurçika aye de kîstî est ê û ganî demêko nêzdî de ultrason û fîlmê aye bêro antene.’ La badê ke Evîn agêraye hepisxane nêzdîyê şeş hewteyan nêameye berdene kontrol. Di hewteyan ra ver Evîn reyna ameye berdene nêweşxane û ultrason û fîlmê aye ameyî antene. Netîceyî sîstemê e-dewlete ser o yenê dîyene. Goreyê netîceyan ganî Evîn demo tewr nêzdî de nêweşxane de kemoterapî bivîna û tedawî bibo. Hewteyêk ra ver Evîne ra biyopsî ame girewtene. Ame vatene ke netîceyê biyopsî do di-hîrê hewteyan de dîyar bibê. Ganî goreyê nê netîceyan tedawîyo hewce bêro destpêkerdene.”
‘Halê aye qet weş nêbî’
Mecît Zapsûyî dîyar kerd ke hîrê rojan ra ver şîyo Hepisxaneyê Kayserî zîyaretê Evîne û nê çîyî ardî ziwan: “Halê aye qet weş nêbî. Hewcedarîyê xo yê rojane tena nêşîyêne bîyaro ca. Evîn goni vereşena. Embazê aye ci rê ardim kenê. Ma pêro seba halê aye zaf xemgîn ê. Tena seba Evîne ney, seba heme hepsîyanê nêweşan xemgîn ê. Hepisxaneyan de zaf embazê ma yê nêweşî est ê ke hewcedarîyê xo yê rojane tena nêşênê bîyarê ca. No hal înan rê zaf zehmet o. Berpirsîyarê hepisxane yo nikayên zaf sert o û vera problemanê ke yenê vatene qet cewabanê eyinîyan nêdano. Seba naye embazê ma zaf zehmetî vînenê. Ganî Evîne demo tewr nêzdî de hepisxane ra bêra vetene û nêweşxaneyêk de tedawî biba. Ganî tedawîya aye teberê hepisxane de, şert û mercanê munasîban ê nêweşxane de bêra kerdene.”
‘Ganî heme hepsîyê nêweşî bêrê verdayene’
Sewbîna Mecît Zapsûyî bale ante Prosesê Aştîye û Komelê Demokratîkî ser o û dîyar kerd ke hukmatî hetanî nika tu gamêka şênbere nêeşta. Ey qiseykerdişê xo wina qedêna: “Komîsyonêk ame awankerdene û seba amadekerdişê qanûnêkê çarçewayî xebate ameye kerdene. La hetanî nika tu gamêka şênbere nêameye eştene. Sewbîna qanûnê çarçewayî hema nêameyo tetbîqkerdene. Hetanî nika ma tu gamêka şênbere nêdîye. Ma wazenê ke gamê cidî bêrê eştene û demo tewr nêzdî de hepsîyê nêweş û sîyasî bêrê verdayene. Hêvîdar ê ke nê prosesî de gamê hewceyî bêrê eştene. Dejê hepsîyanê nêweşan dejê ma pêroyî yo. Ganî heqê tedawî yê hepsîyanê nêweşan nêweşxaneyan de bêro garantîkerdene û nê mewzûyî de îhmal nêbo. Ganî heme hepsîyê nêweşî bêrê verdayene. Waştişê mi no yo ke dewlete demo tewr nêzdî de gamêka şênbere bierza ke welat de aştî û aramî ca bigîro û hepsîyê ma zî azad bibê.”
