Projeyê Taqîbkerdişê Heqan, Belgekerdiş û Piştîdayîşî do hetê Komela Rojnamegeranê Cinîyan a Mezopotamya (MKG) û Komela Rojnamegeran a Dîcle-Firatî (DFG) ra bêro ramitene. Proje do binpaykerdişanê heqan ê vera rojnamegeranê cinîyanê kurdan belge bikero.
Projeyo ke hetê Yewîya Ewropa ra yeno fînansekerdene û bi hemkarîya Weqfa Heqanê Merdiman a Tirkîya (TÎHV) yeno bicaardene, rojnamegeranê cinîyanê kurdan ê Tirkîya esas gêno ke hem bi sebebê xebatanê xo yê rojnamegerîye hem zî bi sebebê nasname û cinsîyetê xo bi destbendkerdiş, tepiştiş, hêrişanê fîzîkîyan, astengkerdişê xebere, tacîzê dîjîtalî, tehdîd û sansurî reyde rî bi rî manenê. Projeyî de ame dîyarkerdene ke belgekerdişê sîstematîk ê nê binpaykerdişan de kêmanîyê girdî est ê.
Çarçewaya projeyî de binpaykerdişê vera nê rojnamegeran do her roje bêrê taqîbkerdene, malûmatê arêkerdeyî do bêrê analîzkerdene û raporî do bi kurdkî, tirkî û îngilîzkî bêrê weşanayene û bişawîyê mekanîzmayanê heqanê merdiman ê neteweyî û mîyanneteweyîyan. Sewbîna torra piştîpêdayîşî ya mabênê rojnamegeranê cinîyan do bêra pêtkerdene û cîyakerdiş, şîdet, tehdîd û teberverdayîşê meslekî do bi nêzdîbîyayîşêko cinsîyetbingeyin bêrê qiseykerdene. DFG do arêkerdiş, verîfîyekerdiş, analîz û raporkerdişî de ca bigîro, MKG zî do bi tecrubeyê warî cigêrayîşê taqîbkerdişî yê cinsîyetbingeyinî bikero û rojnamegeranê cinîyan reyde têkilîyanê piştîdayîşî rono.
Amancê projeyî pawitişê azadîya çapemenî û îfadeyî, temînkerdişê şertanê karî yê biemnîyetan, kêmkerdişê tenyamendişê vera binpaykerdişan û ronayîşê mekanîzmayanê taqîbkerdiş û pawitişî yê mendeyan o ke rojnamegerê cinî şertanê seypêyan û azadan de bieşkê bixebitîyê.











