Platformê Dezgehanê Demokratîkan ê Êlihî serrgêra tayînkerdişê qeyûman a şaredarîyanê Êlih, Mardîn û Xelfetî de eşkerayîyêk daye û vat ke ê do qet rayîr nêdê talankeran.
Bi pêşengîya Platformê Dezgehanê Demokratîkan ê Êlihî, bi minasebetê serrgêra 2. ya tayînkerdişê qayûman ê şaredarîyanê Êlih, Mardîn û Xelfetî Cadeyê Gulîstanî de eşkerayî ame dayene. Îdarekar û endamê partîyanê sîyasîyan û dezgehanê komelkîyan û zaf kesî eşkerayî de amade bîyî. Eşkerayî de pankarto “Îradeyê şarî nêyeno xespkerdene, demokrasî teslîm nêgîrîyena. Pratîkê qeyûmî ney, îradeyê şarî do qezenc bikero” ame akerdene.
Endama Meclîsê Şaredarîya Êlihî Dîlan Kirare eşkerayî wende û da zanayene ke 2 serrî verê cû îradeyê şarê Êlihî ame xespkerdene û wina vat: “Di serrî verê cû fikirîyayî ke Anqara ra do bieşkê îradeyê şarî xesp bikerê. La şarê ma qet îradeyê xo nêdano destê qeyûman. Şarê ma do hesabê heqê xo yê weçînayîşî biperso û qet rayîr nêdo talankeran.”
Eşkerayî bi vatişê sloganê “Qeyim talan e, berxwedan jiyan e” qedîya.
