Gabar de goristanê ke endamê PKKyî tede ameyê defnkerdene, rê hêrişêko newe ame kerdene. Hêrişî de kemerê goran ameyî şikitene û gulê sûnî yê ke goristan de verdayî ameyî veşnayene.
Şirnex de Koyê Gabarî de dewa Basretî de, “Goristanê Şehîd Binevşe” yo ke endamê PKKyî tede ameyê defnkerdene, rê hêrişêko newe ame kerdene. Hêriş, wexto ke hevalanê HPGyîj Evren Akkuşî (Çekwar), ke 17ê nîsana 2007î de Gabar de pêkewtişî de ganê xo ra bî, goristan zîyaret kerd, ame fehmkerdene.
Hevalê Akkuşî, ke Xana Axparî (Çinar) ra amey, Komela Yewî Kultur Piştgirî û Hetkarîya Keyeyanê ke Merdimê xo Derguşê Şaristanîye de Vîndî Kerdî (MEBYA-DER) reyde goristan zîyaret kerd. Zîyaretî de ame dîyayene ke goristan reyna ameyo xirabkerdene, kemerê goran ameyî şikitene û gulê sûnî yê ke malbatan verdayî, tevî dasmalê zerd, sûr û keskî, ameyî veşnayene.
Rêveberê MEBYA-DER ê Şirnexî Firat Duymakî vat ke 1ê teşrîna peyêne de keyeyan reyde goristan zîyaret kerd, di rojan ra pey ke reyna amey, ma dî ke goristan xirab bîyo. Duymakî, ke hêrişî rê reaksîyon mojna, vat: “Malbatî 20 serran ra nat goranê domananê xo gêrenê. Dima ke peyda kenê, yenê zîyaret kenê, labelê çîyo ke vînenê no yo. No qebul nêbeno. Ma nêzanê ke kamî kerd. Wexto ke prosesê haştî dest pêkerd, waştişê ma ê goristanan reyna virastene yo. Kamî ke na hêriş caard, ganî bêro dîyarkerdene û hesab bido.”
Hevalê Akkuşî û rêveberê MEBYA-DERî kemerê goran ê şikîyayeyan reyna pêser kerdî û kêlekê goran de verdayî.
Zîyaret bi duayanê ke ameyî wendene qedîya.
