Ankara – Ayla Akat Ata, Çaglar Demîrele û Dîba Keskîne dawetkarê Konferansê Cinîyan ê “Ma pîya qalê aştîye kenê” yê. Ayla Akat Ata û Çaglar Demîrele aktîvîstê TJA’yî yê, Dîba Keskîne zî endama Înîsîyatîfê Yewîya Demokratîke ya. Înan dîyar kerd ke amancê înan ê konferansî no yo ke derheqê prosesî û heme problemanê komelkîyan de fikr û ramanê cinîyan bigîrê û xetê mucadeleyêko pîyayî awan bikerê.
Konferansê cinîyan ê “Ma pîya qalê aştîye kenê” bi seyan cinîyê ke bawerî, nasname, fikr û ramanê înan cîya yê, ardî kişta yewbînan. Konferans vengdayîşê 80 cinîyan ser o vizêr Ankara de dest pêkerd. Mîyanê înan de rojnamegerî, nuştoxî, akademîsyenî, aktîvîstî û sîyasetmedarî est ê. Konferans ewro zî do bi babetanê cîya cîyayan dewam bikero. Roja yewine ya konferansî de cinîyan herçiqas ferqî est ê zî derheqê problemanê pîyayîyan ser o qisey kerd ke ê pê ribirî manenê. Munaqeşeya hewcedarîya mucadeleyêko pîyayî ameye vejîya werte. Roniştiş de derheqê Prosesê Aştî û Komelê Demokratîkî de zî erjnayîşî ameyî kerdiş. Ame qiseykerdiş ke prosesî de cinî do rol û wezîfeyêkê senên bigîrê. Cinîyanê ke tewrê konferansî bîyî, yew bi yew heqê qiseykerdişî girewt û derheqê babetan de fikr, raman û pêşnîyazê xo vatî.
Dawetkarê konferansî Ayla Akat Ata, Çaglar Demîrele û Dîba Keskîne derheqê amanc û muhîmîya konferansî de Ajansê Welatî (AW) rê qisey kerd.
‘Amanc û muhîmîya prosesî’
Ayla Akat Ata bale ante Prosesê Aştî û Komelê Demokratîkî ser ke bi vengdayîşê Rayberê Şarê Kurdî Abdullah Ocalanî dest pêkerdbi. Aye wina va: “No prosesêko tarîxî yo. Ma bi no konferans wazenê ke têgêrayîşê cinîyanê kurdan û têgêrayîşanê cinîyan ê Tirkîya biyarê kişta yewbînan û mucadeleyêko pîyayî ser o vinderê. Ma wazenê ke nê prosesî de derheqê xebatanê aştîye de û derheqê ke ma eşkenê pîya çi bikerê de munaqeşe bikerê. Nê 2 rojan de ma wazenê ke hetê ekolojî, ekonomî, proses û seyyewbînîye ra ‘cinî çi fikirîyenê’ ser o munaqeşe bikerê. Ma hêvî kenê ke no konferans ra neticeyêk rinde vejîyo. Ma wazenê ke no konferans de ‘cinî do rolêkê senên bigîrê’ munaqeşe bikerê. Zaf cinîyê ke fikr û ramanê înan cîya yê, tewrê konferansî bîyê. Verê her çîyî ma do goştarîya yewbînan bikerê. Dima zî ma do nê prosesî de ‘ma eşkenê pîya çi bikerê’ munaqeşe bikerê û xerîteya rayîrî pîya dîyar bikerê.”
‘Îqtîdar goreyê ruhê prosesî ney, goreyê menfeetanê xo têgêreno’
Dîba Keskîne ard ziwan ke amancanê înan ê konferansî ra yew zî Prosesê Aştî û Komelê Demokratîkî de awankerdişê mucadeleyêko pîyayî yê cinîyan o. Aye wina va: “Amancê prosesî aştîye ya. Gamê lazimî hetanî nika nêameyê eştiş. Aseno ke tayê hêzî nêwazenê no proses bireso amancê xo û îqtîdarî zî goreyê prosesî gaman nêerzeno. No zî mîyanê komelî de fikaran virazeno. Îqtîdar goreyê hewcedarîyanê prosesî ney, goreyê menfeetanê xo têgêreno. Coka nê 2 serran de çîyê ke ameyêne hêvîkerdiş, nêameyî ca. Cinîyê ke vera nê şerî yê, ganî bêrê kişta yewbînan û vera naye pîya mucadele bikerê. Amancê nê konferansî zî ameyîşê cinîyan o kişta yewbînan seba aştîye ya.”
‘Eke cinî hîna zaf bêrê kişta yewbînan, eşkenê pêşengîya Komelê Demokratîkî bikerê’
Çaglar Demîrele zî dîyar kerd ke 80 cinîyê ke fikr û ramanê înan cîya yê, seba mucadeleyêko pîyayî yê cinîyan hewcedarîya konferansêkê winasî dîyo. Aye wina va: “Amancê ma no yo ke seba seyyewbînî, aştîye, demokrasî, vera şîdetê ser cinîyan, seba ekolojî û problemanê pêroyîyan fikr û ramanê cinîyan bigîrê û mucadeleyêko pîyayî ser o munaqeşe bikerê. Eke cinî hîna zaf bêrê kişta yewbînan, eşkenê pêşengîya Komelê Demokratîkî bikerê. Konferans de her rengê cinîyan yeno dîyayîş. Badê nê konferansî zî ma wazenê ke her şaristan û taxe de seba mucadeleyêko pîyayî yê cinîyan xebatê cîya cîyayî bêrê kerdiş.”
