Bi mektuba ke îmzakaranê 29 welatanê dinya nuşte, verê kombîyayîşê aşma kanûne ame waştene ke seba tatbîqkerdişê heqê hêvîye yê Rayber Apoyî Tirkîya qerarê MHMEyî yê 2014î bîyaro ca û gamê şênberî bêrê eştene.
Çarçewaya kampanyaya mîyanneteweyî ya “Azadî Seba Abdullah Ocalanî, Çareserîya Sîyasî Seba Meseleya Kurdan” de mektubêk ameye şawitene Serekîya Komîteya Wezîran a Konseya Ewropa. Mektube bi piştîdayîşê 620 îmzakaranê 29 welatan ameye amadekerdene û verê kombîyayîşê heqanê merdiman ê Komîteya Wezîran ê 1-3ê kanûne 2026î ameye şawitene. Mektube welatanê îmzakaran ra zî cîya-cîya ameye resnayene Konseya Ewropa û heta kombîyayîşê kanûne pêdîyayîşê temsîlkaranê daîmîyan ê welatan zî yenê plankerdene.
Mîyanê îmzakaran de 58 temsîlkarê weçînayeyî, kesê girêdayeyê 30 partîyanê sîyasîyan, 90 rêxistinê komelê sîvîlî û 16 sendîqayî est ê. Lîste de wayîrê Xelata Nobelî ya Fîzîkî ya 2022î Anton Zeilinger, fîlozof Slavoj Žižek, endama Parlamentoyê Ewropa Ozlem Alev Demîrel, Nicola Fratoianni, Maurizio Acerbo, Bjørnar Moxnes, Carlo Sommaruga, Kadîr Kasirga û Mertxe Aizpurua zî est ê.
Mektube ke sernameyê aye “Tatbîqkerdişê heqê hêvîye hetê Tirkîya ra seba serkewtişê prosesê haştî dîyarker o” yo, de wina ame vatene: “Ma venga Komîteya Wezîran a Konseya Ewropa danê ke goreyê qerarê Ocalan/Tirkîya (Hûmare 2) û qeraranê MHMEyî yê grûba dewa ya Gurbanî temîn bikera ke Tirkîya heqê hêvîye tatbîq bikera. No seba averberdişê Prosesê Haştî û Komelê Demokratîkî ke Abdullah Ocalanî dayo destpêkerdene, demêko dîyarker o. Tatbîqkerdişê heqê hêvîye gama huqûqî ya bingeyin a ke seba qedênayîşê rejîmê tecrîdî yo giran ke 27 serrî yo Abdullah Ocalanî ser o yeno ferzkerdene û beşdarîya ey a efektîfe ya prosesê haştî sey serekmuzakerekar ganî bêra eştene.”
