Teşkîlatê Ewlehîya Îsraîlî (Şin Bet), seba ke beşdarîya raydayoxanê ereban weçînayîşan de zêde bibo, Katar û Tirkîya ra fon dayîş şikî rê tehqîqat do bikero.
Îsraîl de raydayîş qedîya. Welatî de ke raydayîş hema dewam keno, tehqîqatêk zî ame destpêkerdene. Serekê Komîteya Weçînayîşî ya Merkezî ya Îsraîlî, dadger Noam Sohlbergî, Serekê Şin Betî David Zinî rê emir da ke derheqê fonanê xerîbanê ke weçînayîşan ser o tesîr kerdişî rê xebitîyayê de tehqîqat bikero. Yeno şikkerdene ke fon Tirkîya û Katar ra ameyê resnayene.
Tehqîqat, şikê ke rêxistinê ereban seba ke beşdarîya raydayîşî herêmê ereban de bi rayîrê bêqanûnî zêde bikerê, mîqdarêko girs pere resnayê ser o bale anceno. Sohlbergî, seba tehqîqatê fonê xerîbî û rişwetê weçînayîşî emirnameyê xo de wina nuşt: “Mi rê şikê girane ameyê resnayene ke weçînayîşan de rêxistinê ke vera menfeetanê Îsraîlî kar kenê, bi fonanê xerîban tesîrêko bêûsul kerdo. Coka ez to rê emir kena ke seba ê îdîayan bigêrî û delîlê ke ê şikan tesdîq bikerê yan zî red bikerê bidest bêrê, qeweta Servîsê Ewlehîya Pêroyî bixebitnî û her çi ke desdê şima ra yeno bikî.”
Şikê Tirkîya û Katarî
Îdia bîy ke Katar û Tirkîya weçînayîşanê Îsraîlî rê mudaxale kerdo. Ame vatene ke Katar û Tirkîya, fonê resnayê çimeyanê muhtemelan ra.
Radyoya Artêşî derheqê tehqîqatî de wina rapor kerd: “Tehqîqatkaran şik kerdo ke kanalê ke seba mudaxaleyê weçînayîşan pere resnayîşî rê xebitîyayê, ê kanalan reyde yewbînî ra kewtê ke verê nê rêxistinê terorî û fonanê înan reyde, û nê bûroyê dovîzî û şubeyê welatanê dişmenan reyde têkilî de bîyî. Şin Betî do bigêro ke pere hetê rêxistinanê xerîban ra yo ya hetê çimeyanê Îsraîlî ra ameyo finansekerdene.”
