Riha – Endamê Komîteya Koçberan a Girê Spî Sebrî Mistefa derbarê êrişa li ser koçberan de axivî û diyar kir ku hin alî bi rêya propagandaya reş dixwazin pêvajoya vegerê asteng bikin û şerê Kurd û Ereban derxînin û da zanîn ku tevî hişyariyan jî koçber bi êrişê re rû bi rû mane.
Komek koçberên Girê Spî yên ku ji bo vegera malên xwe berê xwe dabûn bajêr, bûn armanca êrişan. Dema koma koçberan gihîşt bajêr, êriş li wan hate kirin. Di encama êrişê de, êrişkaran ziyan da wesayîtên koçberan û talan kirin. Zêdetirî 100 malbatên Kurd li hundirê avahiya Gerînendetiya Koçberiyê ya Herêmê hatibûn dorpêçkirin û daxwaza destwerdana lezgîn ji bo parastina wan û lêpirsîna êrişên li dijî welatiyên Kurd ên vegerin malên xwe hat kirin. Piştî bangên lezgîn Hêzên Ewlekariya Hundirîn a Herêma Kobanê zêdetirî 100 malbatên Kurd ji zarok û jinan ku di avahiya Gerînendetiya Koçberiyê ya Girê Spî de hatibûn dorpêçkirin, hatin derxistin û birin cihê bi ewle.
Endamê Komîteya Koçberên Girê Spî Sebrî Mistefa derbarê vê bûyerê û provokasyona hate kirin de ji ajansa me re axivî.
‘Li dijî Kurdan propagandayê dikin’
Sebrî Mistefa diyar kir ku wan wekî Komîteya Girê Spî demeke dirêj e li ser maf, hejmar û belgekirina mal û milkên koçberan xebatan dikin û Hikûmeta Şamê re di nava têkiliyê de ne û wiha got: “Tevî pêvajoya entegrasyonê jî hin alî naxwazin ev pêvajo bimeşe û hin alî her tim tevlîheviyan derdixin ku şerê Kurd û Ereban çêbibe. Hîn kes li ser ragihandina Sûriyeyê zimanekî neyini bikar tînin û gelek tiştan sor dike û ev hêj jî berdewam e. Me gelek kesên ku dixwazin tevlîhevî derbixin tespît kir û navê wan da hikûmetê. Ev kes bi taybetî li ser ragihandinê di nav civaka Ereb de li dijî Kurdan propagandaya reş didin kirin ku koçber venegerin.”
‘Bangên xapînok û hişyariya komîteyê’
Sebrî Mistefa bal kişand ser bangên ku di rojên borî de li ser ragihandinê hatibûn kirin û diyar kir ku ev bang li ser navê Gerînendetiya Girê Spî ya girêdayî Walîtiya Reqayê hatine kirin û wiha domand:”Beriya çend rojan hin kesan li ser ragihandinê bang li koçberan kiribûn û digotin ‘Werin malên xwe û belgeyên xwe bînin mudîriyet dê malê we bide we’. Me gelek caran gelê xwe hişyar kir ku bêyî agahiya komîteyê van gotinan nexapin û yek bi yek neçin, ji ber ku eger bûyer biqewimin em nikarin pêşiyê bigirin. Lê mixabin koçberên me bêyî ku bi me re têkevin nava têkiliyê çûn wir û ev bûyerên êrişê derketin holê.”
Zêdetirî 100 malbat hatin dorpêçkirin
Sebrî Mistefa da zanîn ku dema gel çûbû cihê gerînendetiyê, êriş li ser wesayîtên wan hatiye kirin û wesayît hatine şewitandin û ev yek anî ziman: “Miletê me di hundirê avahiyê de hat dorpêçkirin. Pişt re ewlekariya Reqa û Kobanê mudaxele kir. Dorpêç nêzî 3 saetan berdewam kir û piştre koçber bi silametî hatin derxistin û gihîştin Kobanê.”
‘Baregehên dewleta Tirk hene’
Sebrî Mistefa di dawiya axaftina xwe de diyar kir ku hikûmeta Şamê rola xwe pêk nayîne û got: “Hikûmeta Şamê berê jî li hemberî bûyerên gelek biçûk ê li Girê Spî rola xwe ya pêwîst nelîst. Çima? Ji ber ku hêj li Girê Spî û gundewarên wê baregehên Dewleta Tirk hene. Ji ber vê yekê hikûmeta Şamê rola xwe nalîze û destê hêzên derve di van bûyeran de heye. Me wekî Komîteya Girê Spî peyamek nivîskî li ser ragihandinê weşand daku kesên di vê êrişê de xwedî rol in, demildest bên lêpirsînkirin û cezakirin.”
