Hukmatê Iraqî derheqê entegrasyonê hêzanê YBŞ û YJŞ’yî ya ke sazîyanê emnîyetî yê Iraqî reyde yo de eşkerayîyêk daye û vat: “Rolê gedeyanê Şingalî pawitişê Iraqî û Şingalî de est o û înan teror û tundrewî ver de xoverdayîş kerd. Coka hukmato federal mesûlîyetê xo yê pawitişê heqanê pêroyê şînanê Êzidîyan teqez keno.”
Sebah al-Numanî, ke Vatoxê Ofîsa Serekwezîrî ya Iraqî yo, metnê eşkerayîya hukmatê Iraqî ya derheqê prosesê entegrasyonê Yewîneyanê Xoverdayîşê Şingalî (YBŞ) û Yewîneyanê Cinîyanê Şingalî (YJŞ) ya ke sazîyanê emnîyetî yê Iraqî reyde yo de vila kerd. Qerar ame girextene ke no peyman ewro Çiyayê Şingalî de bi eşkerayîyêka hevpare bêro eşkerakerdene.
Eşkerayî wina ya:
“Fermandarê Pêroyî yê Artêşa Iraqî birêz Elî Zeydî reyde ewro merasîmê fermî yê birnayîşê peywendîya leşkerî ya Yewîneyanê Xoverdayîşê Şingalî (YBŞ) û entegrasyonê înan ê hêzanê emnîyetî yê Iraqî reyde, hem zî dayîşê mesûlîyetê emnîyetê Çiyayê Şingalî desthilatdarîya alîyanê federalan rê beno.
Na game çarçewayê rêxistinkerdişê çekanê destê dewlete de ya. Hukmatê Iraqî ser o qerar da û bernameyan û wezaretanê xo de ca da. Hem zî sey destkewteyêka neteweyî yena hesibnayene, ke bingeyêk o seba merheleyêka newîye ya mesûlîyetê emnîyetê qezaya Şingalî. Na game de hukmatê Iraqî qurbanîdayîşanê girdan û bêemsalan, ke komela Êzidîyan pawitişê Iraqî pêroyî û qezaya Şingalî taybetî, teror û projeyê tundrewîye ver de mojnayê, berz erjneno.
Na game girêdayîşê gedeyanê komela Êzidî prensîbanê neteweyî reyde teqez kena. Nê bingeyî ser o, destûrê Iraqî her çalakîya ke teber ra çarçewaya yasayî de bo rê vera beno; hem zî no peyam yeno resnayene ke girewtişê çekan armanc nîyo, labelê vasitayêk o seba pawitişê welatî ke prensîbanê yasayî û destûrî reyde bo. Hem zî girêdayîşê qeraranê desthilatdarîya federalî reyde, gamêk a ke desthilatdarîya dewlete bihêz kena, qerarê neteweyî xurt kena û hêzê sazîyanê dewlete seba caardişê girêdayîşê destûrî û qanûnanê dadwerîye aver bena.
Hukmato federal mesûlîyetê xo yê temam ê seba pawitişê heqanê şînanê Êzidîyan teqez keno; taybetî seba ê kesan ke şerê teror de xo ver dayî û rûbirûyê neheqîyan bîyî, na rayîr de qurbanîyê girdî ra şehîd, birîndar, revnayîşê keyeyan û koçberbîyayîş dayî. Hem zî girêdayîşê xo yê seba tezmînatê keyeyanê qurbanîyan, ziyanê encamê hêrişanê terorîstî û newe ra awankerdişê qezaya Şingalî reyna vano.”
