Aktîvîteyê ke Şaredarîya Amedî ya Şaristanê Girdî seba 21ê Sibate Roja Ziwanê Dayîke ya Dinya organîze kerdî, konseranê hunermendan Ayfer Duzdaş û Alî Tekbaşî qedîyayî.
Aktîvîteyanê tewir-tewiran ke Serekîya Daîreya Karanê Kultur û Sosyalan seba 21ê Sibate Roja Ziwanê Dayîke ya Dinya yew hewte dewam kerd, konseran reyde qedîyayî. Programê konserî ke Merkezê Kultur û Kongre yê Çand Amedî de virazîya, tede sînevîzyonê aktîvîteyanê ke şaredarîyan û rêxistinanê sivîlan seba roja ziwanê dayîke kerdî, nîşan dîya.
‘Ma ganî ziwanê xo rê wayîrîye bikerê’
Sereka Daîreya Karanê Kultur û Sosyalan Zeynep Yaş ke verê konserî qisey kerd, qalê xo bi “Şima mêman nîyê, wayîrê keyeyî yê. No karê ma yo ke ma nê xebatan bikerê” dest pêkerd.
Yaş, ardî vîr ke Bangladeşîyan pê têkoşînêko gird ziwanê xo dinya de dabî qebulkerdiş û wina dewam kerd: “Ma bi nê wesîleyî ewro Roja Ziwanê Dayîke ya Dinya pîroz kenê. Ewro her Kurd ganî ziwanê ma rê wayîrîye bikero ke binê rîskê vîndîbîyayîşî der o, û no mîras dewam bikero. Ma ganî nê hezaran serranê vîyarteyan, pê ziwanê xo nê mîrasî bipawê. Çunke eke ziwan dewam bikero ma şênê bibê wayîrê nê mîrasî, o mîras tena bi ziwan şêno ma rê bêro mendene. Ma bi na bawerî vanê ke, tena yew roje ney, tena 21ê Sibate ney, wa her roje roja ziwanê ma bo. Ziwanê ma yo rind pîrozê ma pêroyînan o.”
Dima hunermendî Ayfer Duzdaş û Alî Tekbaşî konser da û goşdaran demêko weş vîyarna.
Programî de kaykerdoxanê Tîyatroyê Bajarî yê Amedî zî skecê xo ke seba roja ziwanê dayîke amade kerdbî, kay kerd.
