Ankara – Kitabê Mahîr Herdemî yê “Manîfestoyê Komelê Komunal yê Demokratîkî” Hepisxaneyê Sêwregi de ame qedexekerdiş; mane no bî ke vengdayîşê Aştî û Komelê Demokratîkî yê Rayberê Şarê Kurdî Abdullah Ocalanî yê 27ê sibate zî tede ca gêno. Parlamentera DEM Partî Newroz Uysal Aslane na babete ser o muracatê Komîsyonê Cigêrayîşê Heqanê Merdiman yê Meclîsî kerd û waşt ke caardişê qedexeyî bêro cigêrayîş.
Kitabê Mahîr Herdemî yê “Manîfestoyê Komelê Komunal yê Demokratîkî” bi maneyê ke vengdayîşê Aştî û Komelê Demokratîkî yê Rayberê Şarê Kurdî Abdullah Ocalanî yê 27ê sibate tede ca gêno, Hepisxaneyê Hûmare 2 yê Sêwregi yê Riha de ame qedexekerdiş.
Parlamentera DEM Partî ya Şirnexî Newroz Uysal Aslane derheqê qedexekerdişê kitabî de muracatê Komîsyonê Cigêrayîşê Heqanê Merdiman (ÎHÎK) yê Meclîsî kerd û waşt ke na babete bêro cigêrayîş. Newroz Uysal Aslane metnê muracatî de waşt ke astengkerdişê kitab û weşanan hetê huqûqî ra bêro cigêrayîş.
Newroz Uysal Aslane dîyar kerd ke kitabê Mahîr Herdemî yê “Manîfestoyê Komelê Komunal yê Demokratîkî” girewte Tacettîn Kalgi rê ameyo erşawitiş la heyetê perwerdeyî yê hepisxaneyî kitab “bitehluke” dîyo û asteng kerdo. Newroz Uysal Aslane îfade kerd ke wexto ke kitab cigêrenê, eşkera beno ke semedê ke fikr û ramanê Abdullah Ocalanî tede ca genê û behsê komelê kurdan keno, ameyo astengkerdiş.
Newroz Uysal Aslane dîyar kerd ke kitab de behsê vengdayîşê Aştî û Komelê Demokratîkî yê Rayberê Şarê Kurdî Abdullah Ocalanî yê 27ê sibate zî beno û wina vat: “Cayê ke vengdayîşî rê ca dayo, sey cayanê ‘bitehluke’ ameyê dîyarkerdiş. Sewbîna Modernîteyê Demokratîk û vurîyayîşê tarîxî yê Têgêrayîşê Kurdan zî bîyê maneyê qedexekerdişî. No qerar tena qerarêkê qedexekerdişî yê hepisxaneyan nîyo; eynî wextî de mojneno ke fikr û ramanê çareserkerdişê meseleya kurdan bi aştîyane hepisxaneyan de senî yenê qedexekerdiş. Ê kitabî de behsê Prosesê Aştî û Komelê Demokratîkî beno ke nika dewam keno. Eşkera yo ke hema zî bi perspektîfê ‘emnîyetî’ meseleya kurdan ra yeno ewnîyayîş.”
Newroz Uysal Aslane dîyar kerd ke caardişê qedexekerden kitaban zaf hepisxaneyan de yeno dîyayîş û hepisxaneyan ra nimûneyî dayî. Newroz Uysal Aslane Komîsyonê Cigêrayîşê Heqanê Merdiman yê Meclîsî ra waşt ke tenaquzê mabênê qedexeyanê hepisxaneyan û prosesê demokratîkî bêro cigêrayîş.
Newroz Uysal Aslane waşt ke nê xalan de cigêrayîş bêro kerdiş:
- Ganî qerarê Heyetê Perwerdeyî yê Hepisxaneyê Tîpê T yê Hûmare 2 yê Sêwregi hetê azadîya fikr û îfadeyî û heqê girewteyî yê resayîşê weşanan ra bêro cigêrayîş.
- Ganî Wezaretê Edaletî ra agahî bêro waştiş ke hepisxaneyan de weşanê derheqê meseleya kurdan, waştişanê tarîxî û sîyasîyan ê kurdan, ramananê birêz Abdullah Ocalanî û paradîgmaya komelê demokratîkî de bi kamcîn maneyan yenê astengkerdiş. Nê waştişî de ganî berpirsîyarîya Wezîrê Edaletî û muhîmîya prosesî verê çiman de bêrê girewtiş; çunke Wezîrê Edaletî bi xo Heyetê Taqîb û Erjnayîşî de wezîfedar o.
- Ganî tedbîrê ke seba caardişê qeraranê Dadgehê Destûrî yê derheqê heqê girewteyan ê resayîşê weşanan de hepisxaneyan de yenê girewtiş û problemê nê warî bêrê cigêrayîş.
- Seba ke qerarê babeta muracatî newe ra bêro erjnayîş û heqê girewteyî yê resayîşê weşanan bêro pawitiş, ganî hetê îdareyê eleqedarî ra cehdê lazimî bêrê kerdiş. Sewbîna ganî nê caardişî zî bêrê cigêrayîş.
