Amed – Pîyê Rojîn Kabaîşe, Nîzamettîn Kabaîşî da zanayene ke serê merdena keynaya ey ra 2 serrî ra zêdeyêro ke wext vîyarto la dosya de yew averşîyayene nêbîya û testê dîatomî nêameyo kerdene. Nîzamettîn Kabaîşî vat: “Cayê gureyî de sînyalê 6 telefonan ameyê tespîtkerdene, keynaya mi ameya qetilkerdene; eke hewce bibo ma eşkenê mezela aye bidê akerdene û heta ke qatîlê keynaya mi nêrê dîyene ma do têkoşînê xo bidê.”
Cigêrayîşê edaletî yê semedê wendakara Beşê Mamostetîya Zanîngehê Yuzuncu Yilê Wanî (YYU) Rojîn Kabaişe bêmabên dewam keno. Cenazeya Rojîn Kabaişe ya ke 27ê Îlona 2024î de vîndî bîbî, 18 rojan ra dima 15ê teşrîna verêne de peravê Gola Wanî de amebî vînayene. Di serrî serê mergê aye yê gumanbarî ser ra vîyartî zî, persî bêcewab ê û şar û keyeyê Rojîne rê bawerî nêdanê . Pîyê Rojîne Nîzamettîn Kabaîşî derheqê halê peyênî yê dosya de, xebatê avukatan û helwestê dezgehanê fermî de Ajansê Welatî rê qisey kerd.
‘Wextê xo de testê dîatomî nêame kerdene; no xetayêka girs a’
Nîzamettîn Kabaişî bale ante ser kêmasîyanê serênan ke destpêkê dewa de bîyî û vat: “Eke wextê xo de samîmiyet bibîyêne, dosya keynaya mi amebî çareserkerdene. Wextê aye de testê dîatomî nêbî, no şaşîyêka zaf girse û giran a. Ê testî de amebî diyarkerdene ke Rojîne çend rojan mîyanê awa gole de menda, kamca de kewta awe û serebûd kamca de qewimîya. Gama ke avûkatê ma dozgerî ra persan pers kenê, nêresnenê. Mîyanê dozgerî û heqîqetî de samîmiyet çin o.”
‘Sînyalê 6 telefonan ameyî tespîtkerdene, la heta ewro nêameyî akerdene’
Nîzamettîn Kabaîşî agahîyê neweyê derheqê sînyalanê telefonan de ke bi rayîrê avûkatê xo Ebdurrahman Karabulutî ra dest vistî, pare kerd û wina domna: “Verê çend rojan avûkatê ma Ebdurrahman Karabulutî ma rê xebere da. La tespîtkerdene ke o şan, a game ke Rojîne tede vîndî bîya û nezdîyê di metre û nîman de, sînyalê şeş telefonan ameyo girewtene. Honca ma rê vajîya ke ê DNAyanê 2 hezar û 500 kesan kontrol kenê la heta ewro tena yê nezdîyê 400-500 kesan ameyî kontrolkerdene. Telefonê Rojîne zî şirawit Mersîn ke bêro akerdene. Gelo sebeb çi yo ke di serrran ra dima înan na game eşte? Çirê wextê xo de nêkerd?”
‘Eke lazim bîyo ma gorê keynaya xo akenê’
Nîzamettîn Kabaîşî da zanayene ke eke cigêrayîş nêro kûrkerdene ê sere danê metodanê peyênan: “Vîdeoyê otopsî yê nezdîyê heşt saetan destê ma de est ê. Ma nê vîdeoyan dezgehanê pisporan ê Ewropa rê bierşawê ke bêrê cigêrayene. Eke rayîrêko bîn nêmendo, sey çareyo peyên ma gorê Rojîne akenê û testê bînî bidê kerdene. Zerrîya ma de adir est o; keynaya mi bi xo xo nêkişta, a ameya qetilkerdene. Kezeba ma veşena. Di serrî, panc serrî yan zî 50 serrî zî wina yo.”
