Heyetê pisporan, dawaya ke vera qerarê “ÇED’î yo pozîtîf” yê projeyê Santralê Enerjîya Rojî û Dezgehê Depokerdişê Enerjî yê Zenkar 2 yê dewa Arzoxlî ya qezaya Sûrî ya Amedî ameye akerdene, dîyar kerd ke cakerdişê proje munasib nîyo.
Baroyê Amedî û şarê dewa Arzoxlî ya qezaya Sûrî vera Wezaretê Dorûverî, Şaristanîye û Vurîyayîşê Îklîmî, seba raporê “ÇED’î yo pozîtîf” yê proje yê “Santralê Enerjîya Rojî û Dezgehê Depokerdişê Enerjî yê Zenkar 2”, dawaya vindarnayîşê îcra û betalkerdişî akerdbî. Çarçewaya dawaya Dadgeha Karanê Îdarî ya 1. ya Amedî de, 16ê temmuze de hetê heyetê pisporan ra keşf ame kerdene.
Raporê keşfî yo ke ame hedrekerdene, tede ame dîyarkerdene ke awanî 64 metre dûrî yê û do vengî ra tesîr bigêrê. Ganî tesîrê beriqnayîşî û çimtarîkerdişî û warê elektromanyetîkî goreyê nê keyeyan bêrê nirxnayene û tedbîrê zêdeyî yê kêmîkerdişî bêrê dîyarkerdene. Sewbîna ganî tedbîrê kontrolkerdişê herikîyayîşê awe yê serê erdî û erozyonî bi şeklêko tesîrdar bêrê cakerdene.
Raporî de ame dîyarkerdene ke bitaybetî tesîrê arêbîyayeyî yê ke beno proje yê cîranî ZENKAR-1 reyde vejîyê meydan, ganî hende ke lazim o bêrê vetene û bi nêzdîbîyayîşêkê hempari yê taqîbkerdiş û îdareyî bêrê destgirewtene.
“Proje zerar dano citekarî û heywankarîye”
Pisporan dîyar kerd ke projeyê GES’î bi nê halê xo yo munasib nîyo. Raporî de ame dîyarkerdene ke awanîyê ke 64 metre dûrî yê, do veng, beriqnayîş û warê elektromanyetîkî ra bi negatîfî tesîr bigêrê. Reyna ame vatene ke tedbîrê seba erozyon û pawitişê awanê serê erdî bes nîyê û no proje do zerar bido herême.
Arkeolog û muhendîsanê elektrîkî zî dîyar kerd ke sînorê warê sîte bes nîyê û analîzê teknîkî yê beriqnayîşî nêameyê kerdene. Peynîya raporî de heyetê pisporan bi yewvengî îlan kerd ke cakerdişê nê projeyî bi nê halê xo hetê teknîkî, ekolojîkî û arkeolojîkî ra munasib nîyo.
