Merdimê Vîndîbîyayan û Şûbeyanê ÎHD’yî yê Amed, Êlih û Colemêrgî no hewte zî çalakîya xo domna. Çalakîyanê nê hewteyî de faîlê 11 hemwelatijanê Pasûrî û aqûbeta Hacî Ahmet Erî ameyê persayene û ame waştene ke faîlî bêrê muhakemekerdene. Êlih de zî qurbanê Qirkerdişê 10ê Teşrîna Verêne ameyê vîr ardene.
Merdimê Vîndîbîyayan û Şûbeyanê ÎHD’yî yê Amed, Êlih û Colemêrgî no hewte zî çalakîya xo ya “Wa Vîndîkerdeyî Bêrê Vînayene, Faîlî Bêrê Muhakemekerdene” ke her hewte virazenê, domna. Amed de faîlê 11 hemwelatijan ameyê persayene ke 9ê teşrîna verêna 1993î de Pasûr de ameybî vîndîkerdene. Colemêrg de aqûbeta Hacî Ahmet Erî ame persayene; Êlih de zî qurbanê Qirkerdişê 10ê Teşrîna Verêne ameyê vîrardene.
AMED
Merdimê Vîndîbîyayan û rayberanê Şûbeya ÎHD’yî ya Amedî, çalakîya xo ya “Wa Vîndîkerdeyî Bêrê Vînayene, Faîlî Bêrê Muhakemekerdene” hewteyo 922. de, verê Abîdeya Heqê Cuyayîşî ya Parka Koşûyolûyî ya qezaya Rezanî ya Amedî de viraşt. Pawitoxê heqê merdiman, endam û rayberanê sazgehanê sîvîl ê komelkî û merdimê vîndîbîyayan tewrê çalakîye bîyî. Çalakîye de fotografê kesê ke ameyê vîndîkerdene ameyê berzkerdene.
ÎHD û merdimê vîndîbîyayan çalakîya nê hewteyî de faîlê 11 hemwelatijanê sîvîlan persayî û waşt ke faîlî bêrê muhakemekerdene. Nê hemwelatijî 9ê teşrîna verêna 1993î de dewa Mezraya Kepirî ya qezaya Pasûrî ya Amedî de ameybî vîndîkerdene.
‘Faîlî hema zî yenê pawitene’
Sekreterê Şûbeya ÎHD’yî ya Amedî Firat Akdenîzî destpêkê çalakîye de qisey kerd û da zanayene ke 31 serrî yo seba kesanê vîndîkerdeyan xo ver danê. Akdenîzî wina va: “A roje ra nat ma persê aqûbeta 11 dewijan kenê ke ma înan ra reyna tu xeber nêgirewta. Heyf ke nê 11 dewijî zî nimuneyanê zaf eşkerayan ê sîyasetê cezayî yê seserrî ra yew ê. Nê merdimî verê çimanê her kesî ameyê berdene û ameyê qirkerdene. Faîlî hema zî yenê pawitene û ma zaf rey kaybazanê nê karî televîzyonan de vînenê; canê ma dejeno.”
‘Ma waştişê edaletî ra fek veranêdanê’
Endamê Komîsyonê Vîndîbîyayan ê ÎHD’yî Murat Yuksekî hîkayeya vîndîkerdena 11 dewijan wend. Yuksekî da zanayene ke çend serrî zî bivîyarê, seba Mehmet Salîh Akdenîz, Celîl Aydogdu, Behçet Tutuş, Mehmet Şerîf Avar, Hesen Avar, Bahrî Şimşek, Mehmet Şah Atala, Turan Demîr, Abdo Yamuk, Nusredîn Yerlîkaya û Umît Taşî û seba heme vîndîbîyayan waştişê edaletî ra fek veranêdanê. Yuksekî wina va: “Ganî dewlete çarçewaya qeydeyanê huqûqê mîyannetewîye hereket bikero û faîlan vejo meydan.”
Eşkerayî bi deqîqeyêk çalakîya roniştişî qedîya.
COLEMÊRG
Şûbeya Komela Heqê Merdiman (ÎHD) a Colemêrgî û Merdimê Vîndîbîyayan zî çalakîya xo ya “Wa Vîndîkerdeyî Bêrê Vînayene, Faîlî Bêrê Muhakemekerdene” hewteyo 248. de Kuçeyê Hunerî yê Geverî de viraşt. Çalakîya nê hewteyî de aqûbeta Hacî Ahmet Erî ame persayene. Hacî Ahmet Er 15ê tebaxa 1995î de dewa Marufan a qezaya Çeleyî ya Colemêrgî de destbendî de ameybî vîndîkerdene.
Destpêkê çalakîye de qurbanê Qirkerdişê 10ê Teşrîna Verêne yê Garê Ankara ameyê vîr ardene û seba înan edalet ame waştene. Dima eşkerayîye hetê rayberê ÎHD’yî yê Colemêrgî Musa Borî ra ame wendene. Eşkerayîye de ame dîyar kerdene ke 31 serrî yo faîlê Hacî Ahmet Erî nêameyê muhakemekerdene û ganî tehqîqatêko tesîrin û hîra bêro kerdene.
Eşkerayî bi çalakîya roniştişî qedîya.
ÊLIH
Merdimê Vîndîbîyayan û rayberanê Şûbeya Komela Heqê Merdiman (ÎHD) a Êlihî, hewteyo 758. de çalakîya xo ya “Wa Vîndîkerdeyî Bêrê Vînayene û Faîlî Bêrê Muhakemekerdene” verê Abîdeya Heqê Merdiman a Cadeya Gulistanî de viraşt. Çalakîye de qurbanê Qirkerdişê 10ê Teşrîna Verêne ameyê vîr ardene. Rayber û endamanê ÎHD’yî, Merdimê Vîndîbîyayan, partîyê sîyasî yê bajarî, Dayîkê Aştîye, aktîvîstê TJA’yî û endamê sazgehanê sîvîl ê komelkî tewrê çalakîye bîyî. Fotografê kesanê ke destbendî de ameyê vîndîkerdene ameyê berzkerdene. Eşkerayî hetê Hemserekê ÎHD’yî yê Êlihî Ahmet Şîrayî ra ame wendene.
Badê eşkerayîye kome şîye Goristanê Girbereşkî û qurbanê qirkerdişî vîr ardê.
RIHA
Şûbeya ÎHD’yî ya Rihayî û Merdimê Vîndîbîyayan zî çalakîya xo ya “Wa Vîndîkerdeyî Bêrê Vînayene, Faîlî Bêrê Muhakemekerdene” hewteyo 85. de viraşt. Merdimê vîndîbîyayan û pawitoxê heqê merdiman Parka Novadayî ya qezaya Xelîlîye ya Rihayî de amê têhet. Çalakîye de pankarta ke fotografanê vîndîbîyayan ra ameybî viraştene û fotografê vîndîkerdeyan ameyê berzkerdene. Endamê sazgehanê sîvîl ê komelkî û xeylî merdimê vîndîbîyayan tewrê çalakîye bîyî.
Çalakîya nê hewteyî de aqûbeta Bedîrhan Tuysuzî ame persayene. Bedîrhan Tuysuz 1979î de dewa Kilicinî ya qezaya Curnê Reşî ya Rihayî de bi zorî ameybî remnayene û a roje ra nat tu xeber ey ra nêameybî girewtene. Çalakîye de hîkayeya vîndîkerdena Bedîrhan Tuysuzî ame wendene.
Eşkerayî bi deqîqeyêk çalakîya roniştişî qedîya.
ÎZMÎR
Şûbeya ÎHD’yî ya Îzmîrî zî seba vîndîkerdeyanê destbendî verê awanîya Sumerbanka Kehane ya Konakî de eşkerayîyêk daye. Eşkerayîye de pankartê “Vîndîbîyayî wijdanê ma yê, wayîrê wijdanê xo vejîyê” û “Vîndîbîyayî eşkera yê, kiştoxî kotî yê?” ameyê akerdene; fotografê vîndîbîyayan pankartan ser o bîyî. Metnê eşkerayîye hetê endamê Heyetê Îdareyê ÎHD’yî Denîz Bayrak ra ame wendene. Eşkerayîya Îzmîrî de zî faîlê 11 hemwelatijan ameyê persayene ke Pasûr de destbendî de ameybî kiştene.
Badê eşkerayîye kome panc deqîqeyan çalakîya roniştişî viraşte.
