AMED – Denîz Gunduzî derheqê Fuarê Kitaban ê Amedî de qisey kerd û vat: “Eleqe seba kitabanê zazakî serre bi serre zêde beno. Merdimî yenê û pers kenê ke derheqê zazakî de çi xebatî est ê. No rind o, la tayê problemê ci est ê û helbet bes nîyo.”
Fuarê Kitaban ê Amedî yo 10. ke hetê Yewîya Weşangeranê Tirkîya, Odaya Bazirganî û Sanayî ya Amedî û TUYAP’î ra Merkezê Fuar û Kongreyî yê Mîyanneteweyî yê Mezopotamya de yeno organîzekerdene, roja xo ya 8. de dewam keno. Ma derheqê eleqeyê wendoxan ê kitabanê kurdkî de endamê Grûba Xebate ya Vateyî û weşanger Denîz Gunduzî reyde qisey kerd.
Denîz Gunduzî vat ke verê cû fuar peynîya teşrîna peyêne de bîyêne, la emsal ameyo antene demêk ke hewa hema germ o û wina îzah kerd: “Emsal fuar ame viraştene, la seba ke wextê karî yo û hewa zaf germ o, şar zaf nêyeno. Mektebî zî newe abîyî û merdiman seba gedeyanê xo xerc kerdo. Coka ameyîşê fuarî şarî rê zehmet beno. Goreyê fikrê mi, no wext seba fuarî munasib nîyo.”
“Beşdarîya weşanxaneyan û eleqeyê wendoxan kêmî bîyo”
Gunduzî dîyar kerd ke seba ke eleqeyê wendoxan kêm bîyo, beşdarîya weşanxaneyan zî kêmî bîya û wina vat: “Verê cû salona peyêne zaf pirr bîyêne, salonê bînî zî pirr bîyêne. La emserr tayê weşanxaneyî beşdar nêbîyî û eleqe zî goreyê ci tay o. Eleqe seba kitabanê zazakî serre bi serre zêde beno; merdimî yenê û pers kenê ke derheqê zazakî de çi xebatî est ê. No rind o, la weşanxaneyî nêşenê tena bi nê eleqeyî xercê xo vejê.”
“Gedeyê ma û xortê ma ziwanê xo nêzanê”
Gunduzî bale ante bêeleqeyîya xort û gedeyan a seba ziwanî ser o û vat: “Hezaran gedeyê mekteban yenê fuar, la ê kitabanê kurdkî (kirdaskî û zazakî) nas nêkenê. Cewab danê û vanê ‘Ma nêzanê, no îngilîzkî yo?’ Merdimê ke eleqedar benê zî, emrê înan hîris serran ra cor o. Xort û gedeyan de eleqe çin o, ziwanê xo nêzanê. No zî seba ma problemêko pîl o.”
“Ziwanê ma emanetê pîlanê ma yo, ganî ma hertim waştişê ziwanî bikerê”
Gunduzî bale ante asîmîlasyonî û muhîmîya têkoşînê ziwanî ser o û wina îzah kerd: “Ziwanê ma kalik û pîlanê ma ra ma rê emanet mendo. Ziwanê ma ziwananê bînan, îngilîzkî, tirkî yan fransizkî ra kêmî nîyo. Seke miletê bînî wayîrê ziwan û kulturê xo vejîyenê, no zî mîras û erjê ma yo û nasnameyê ma temsîl keno. Ganî ma ziwanê xo ra hes bikerê, bimusnê gedeyanê xo û perwerde de zî waştişê ci bikerê. Ma biwanê û binusê. Ez tîya ra venga miletê xo dana ke vera asîmîlasyonî vindero û seba ziwanê xo têkoşîn bikero.”
